संपादक: मोईन सय्यद / प्रतिनिधी: अवधुत सावंत
डॉ.श्रीकांत शिंदें फाउंडेशन च्या माध्यमातून गेले पाच वर्षांपासून डोंबिवली शहरात आयोजित केला जाणारा सर्वात मोठा रासरंग नवरात्रोत्सव दोन वर्षांच्या कोरोना मुळे पडलेल्या खंडानंतर आणि यंदाच्या नवीन एकनाथ शिंदे-देवेंद्र फडणवीस सरकारने जसे दहीहंडी व गणेशोत्सव सारख्या हिंदू सणांवरील सगळे निर्बंध उठवल्यामुळे यंदा पुन्हा आयोजित करण्यात आला आहे.
कल्याण लोकसभा मतदारसंघाचे लोकप्रिय खासदार डॉ.श्रीकांत शिंदे यांच्या ‘डॉ.श्रीकांत शिंदे फाउंडेशनच्या माध्यमातून डोंबिवलीत नऊ दिवस हा भव्यदिव्य रास गरबा आयोजित केला जातो. तरुणांसह अबाल-वृद्धांमध्ये नऊ दिवस या उत्सवाची उत्सुकता असते. सुमारे एक लाख नागरिक या उत्सवात प्रत्यक्ष सहभागी होत असतात. यंदा २६ सप्टेंबर ते ४ ऑक्टोबर दरम्यान हा उत्सव रंगणार आहे.
विकास कामांच्या माध्यमातून शहराला आकार देणारे कल्याण लोकसभा मतदार संघाचे लोकप्रिय खासदार डॉ.श्रीकांत शिंदे हे विविध सांस्कृतिक कार्यक्रमातून संस्कृती टिकवून ठेवण्याचे कार्यही करत असतात. कला, नृत्य, संगीत, खेळ यांचा अनोखा संगम असलेला अंबरनाथचा ‘शिव मंदिर आर्ट फेस्टिवल’ देशभरात प्रसिद्ध झाला आहे. त्याचप्रमाणे डोंबिवली शहरात आयोजित केला जाणारा भव्यदिव्य रास रंग हा कार्यक्रम ही डॉ.श्रीकांत शिंदे फाउंडेशनच्या माध्यमातून गेल्या काही वर्षांपासून आयोजित केला जातो. उपनगरातील सर्वात मोठा नवरात्रोत्सव म्हणूनही या रास रंग कार्यक्रमाकडे पाहिले जाते. तरुण-तरुणींसह अबाल आणि ज्येष्ठ नागरिकही या उत्सवाची आतुरतेने प्रतीक्षा करत असतात. मराठमोळ्या भोंडल्याला गुजराती बांधवांच्या गरब्याचा साज या रासरंग उत्सवाच्या निमित्ताने मिळतो.
दरवर्षी एक लाखांहून अधिक जण या उत्सवात हजेरी लावत असतात. खासदार डॉ.श्रीकांत शिंदे यांच्या या उत्सवाला मराठी, हिंदी सिने, नाट्य आणि टिव्ही जगतातील अनेक प्रसिद्ध कलाकार, गायक, गीतकार, संगीतकार आपली हजेरी लावत असतात. गेल्या दोन वर्षात कोरोनाच्या सावटामुळे रासरंग नवरात्रोत्सव रद्द करण्यात आलं होता. मात्र यंदा ठाणे जिल्ह्याचे लाडके माननीय एकनाथ शिंदे मुख्यमंत्री पदी विराजमान झाल्यामुळे नव्या उत्साहात आणि जल्लोषात या रासरंग उत्सवाचे आयोजन करण्यात आले आहे.
दरवर्षी प्रमाणे डॉ. श्रीकांत शिंदे फाउंडेशन आणि नवदुर्गा युवा मंडळाच्या माध्यमातून २६ सप्टेंबर ते ४ ऑक्टोबर दरम्यान डोंबिवलीतील डी.एन.सी शाळेच्या पटांगणावर नऊ दिवस हा उत्सव रंगणार आहे. या नऊ दिवसात तुषार सोनिग्रा यांच्या बिट १६ चे वाद्यवृंद उत्सवात संगीत संयोजन करतील. तर अर्चना महाजन, दिलेश दोषी, सेजल शाह, पंकज कक्कड, धर्मेश जोशी, कौशिक गडा या कलावंतांचे सादरीकरण होणार असून त्याला प्रसिद्ध निवेदिका शलाका हिच्या सूत्रसंचालनाची जोड मिळणार आहे. राज्याचे लाडके मुख्यमंत्री एकनाथ शिंदे हे या रासरंग उत्सवाला हजेरी लावणार आहेत तर महत्वाचे नेते, मंत्री, कलावंत या उत्सवाला प्रामुख्याने हजेरी लावणार आहेत.
गरबाप्रेमींनी मोठ्या कालावधीनंतर साजरा होणाऱ्या डोंबिवलीतील सर्वात मोठ्या गरबा उत्सवात मोठ्या संख्येने सहभागी होण्याचे आवाहन कल्याण लोकसभेचे लाडके खासदार डॉ. श्रीकांत एकनाथ शिंदे यांनी केले आहे. या नवरात्रोत्सवात विविध स्पर्धा होणार असून सोन्याची व आकर्षक बक्षिसांची लयलूट उत्सवात सहभागी होणाऱ्यांना करता येणार आहे अशी माहिती झालेल्या पत्रकार परिषदेत उपस्थित पत्रकारांना शिंदे समर्थक शिवसेना कल्याण जिल्हाप्रमुख गोपाळ लांडगे, उपजिल्हाप्रमुख राजेश कदम, डोंबिवली शहरप्रमुख राजेश मोरे, ज्येष्ठ नगरसेवक व माजी स्थायी समिती सभापती रमेश म्हात्रे, कल्याण जिल्हा युवा अधिकारी दीपेश म्हात्रे, रवी मट्या पाटील, रणजित जोशी, अभिजित दरेकर, उपशहरप्रमुख अमित बनसोडे यांच्या उपस्थितीत देण्यात आली.