मीरा-भाईंदर प्रतिनिधी : मीरारोड पूर्वेकडील शांतीनगर परिसरात गजबजलेल्या ठिकाणी दिवसा ढवळ्या सशस्त्र दरोडा पडला असून चार दरोडेखोरांनी बंदुकीचा धाक दाखवून लाखोंचे दागिने लुटून नेल्याची घटना घडल्याने शहरात एकाच खळबळ उडाली आहे.

याबाबत पोलिसांनी दिलेल्या माहितीनुसार गुरुवार ७ जानेवारी रोजी दुपारी दोन वाजण्याच्या सुमारास दोन मोटारसायकली वरून चार अज्ञात व्यक्ती दागिने खरेदी करण्याच्या बहाण्याने मीरारोड पूर्वेकडील शांतीनगर सेक्टर क्रमांक चारच्या भर चौकात असलेले एस. कुमार गोल्ड एन्ड डायमंड जेवलर्स या दागिन्यांच्या शोरूम मध्ये शिरले . त्यानंतर त्यांनी दागिने पाहण्याच्या बहाण्याने तिथे काम करणाऱ्या कर्मचाऱ्यांना एकत्रित केले आणि मग त्या चार दरोडेखोरां पैकी एकाने त्याच्याकडे असलेले पिस्तूल बाहेर काढून शोरूम मधील कर्मचाऱ्यांना धमकावण्यास सुरुवात केली आणि मग त्यांच्या इतर साथीदारांनी शोरूम मधील सर्व दागिने त्यांच्याकडे असलेल्या बॅगेत भरण्यास सुरुवात केली. त्यानंतर त्या चारही दरोडेखोरांनी अगदी शांतपणे बाहेर येऊन पळून जात होते पण त्यांनी आणलेल्या दोन मोटारसायकली पैकी एक मोटारसायकल चालूच झाली नाही म्हणून ती एक मोटारसायकल तिथेच सोडून पळ काढला.

हि सर्व घटना दागिन्यांच्या शोरूममध्ये लावण्यात आलेल्या सीसीटीव्हीमध्ये कैद झाली असून अत्यंत शांतपणे हा दरोडा टाकण्यात येत होता असे स्पष्ट दिसत आहे. सर्वात आश्चर्याची गोष्ट म्हणजे अगदी गजबजलेल्या ठिकाणी हे दागिन्याचे शोरूम आहे. दिवसा ढवळ्या हा दरोडा टाकण्यात येत असताना देखील कुणीच याकडे लक्ष दिले नाही किंवा कुणीच आरडा ओरडा का केला नाही? असा प्रश्न उपस्थित केला जात आहे. आणखीन एक महत्वाची गोष्ट म्हणजे एवढे मोठे दागिन्याचे शोरूम असून देखील या शोरूममध्ये अलार्म सिस्टम बसविण्यात आली नव्हती का? किंवा बसवलेली असली तरी ती का वाजविण्यात आली नाही? याबाबत आश्चर्य व्यक्त केले जात आहे.

मीरा-भाईंदर महानगरापलिका क्षेत्र आणि वसई-विरार महानगरपालिका क्षेत्रा करीत नवीन पोलीस आयुक्तालयाची स्थापना झाल्यानंतर सशस्त्र दरोडा टाकण्याची हि पहिलीच मोठी घटना घडली असून त्यामुळे ह्या घटनेतील आरोपी दरोडेखोरांना पकडण्याचे एक मोठे आव्हान आता मीरा-भाईंदर शहरातील पोलिसांसमोर उभे राहिले आहे. पोलीस आता हे प्रकरण कोणत्या प्रकारे हाताळतात आणि किती लवकर ह्या दरोडेखोरांना पकडतात हे पाहणे महत्वाचे ठरणार आहे.

मात्र मीरारोड परिसरातील मुख्य रस्त्यावर, बाजार असलेल्यात गजबजलेल्या ठिकाणी एका नामांकित दागिन्यांच्या शोरुमवर दिवसा ढवळ्या अशा प्रकारे सशस्त्र दरोडा पडल्याने मीरा-भाईंदर शहरातील कायदा-सुव्यवस्थेचा प्रश्न पुन्हा एकदा ऐरणीवर आला आहे.