सुप्रसिद्ध अभिनेत्री प्रिया मराठे यांचे वयाच्या अवघ्या ३८ व्या वर्षी कर्करोगामुळे निधन

मुंबई प्रतिनिधी, 31 ऑगस्ट : मराठी आणि हिंदी मालिकांमधून प्रेक्षकांच्या मनावर राज्य करणारी सुप्रसिद्ध अभिनेत्री प्रिया मराठे यांचे कर्करोगामुळे निधन झाले. त्या 38 वर्षांच्या होत्या. गेल्या दोन वर्षांपासून त्या या आजाराशी झुंज देत होत्या. आज पहाटे मिरारोड येथील निवासस्थानी त्यांनी अखेरचा श्वास घेतला.

प्रिया मराठे यांनी अभिनय क्षेत्रात पाऊल “या सुखांनो या“ या मालिकेतून टाकले होते. त्यानंतर झी टीव्हीवरील लोकप्रिय मालिकेत “पवित्र रिश्ता“ मधील वर्षा ही भूमिका त्यांच्या कारकिर्दीतील महत्त्वाचा टप्पा ठरली. “कसम से“, “बड़े अच्छे लगते हैं“, “तुझेच मी गीत गात आहे“ अशा अनेक मालिकांमधून त्यांनी उल्लेखनीय भूमिका केल्या आहेत.

अभिनयासोबतच सामाजिक जबाबदारी पार पाडत प्रिया मराठे या मिरा-भाईंदर महानगरपालिकेच्या स्वच्छता अभियान मोहिमेच्या ब्रँड अँबेसिडेर म्हणूनही कार्यरत होत्या. नागरिकांमध्ये स्वच्छतेबाबत जागरूकता निर्माण करण्यासाठी त्यांनी महत्त्वाची भूमिका बजावली होती.

त्यांच्या निधनाची वार्ता समजताच सहकलाकार आणि चाहत्यांनी शोक व्यक्त केला. “पवित्र रिश्ता“ मधील त्यांच्या सहकलाकार उषा नाडकर्णी यांनी प्रतिक्रिया देताना म्हटले, “प्रिया एक उत्तम अभिनेत्री होती. इतक्या कमी वयात तिचं जाणं मनाला वेदना देणारं आहे.” ऑन-स्क्रीन पती अनुराग शर्मा यांनीही दुःख व्यक्त करत, “प्रिया अतिशय चांगली सहकलाकार आणि मैत्रीण होती. तिच्या जाण्याने मोठी पोकळी निर्माण झाली आहे,” असे म्हटले.

अभिनेता सबोध भावे, ज्यांना प्रिया बहिणीसारखी होती, यांनी सोशल मीडियावर लिहिले, “प्रिया शेवटपर्यंत कर्करोगाशी झुंज देत राहिली. तिचा संघर्ष प्रेरणादायी होता. मात्र नियतीपुढे आपण सर्व हतबल ठरलो.”

प्रिया मराठे यांच्या अल्पवयात झालेल्या दुर्दैवी निधनामुळे मराठी आणि हिंदी मनोरंजनसृष्टीवर शोककळा पसरली आहे. त्यांच्या कारकिर्दीतील भूमिका, साधेपणा आणि सामाजिक उपक्रमांतील त्यांचे योगदान यामुळे त्या प्रेक्षकांच्या मनात सदैव जिवंत राहतील.