अवधूत सावंत, प्रतिनिधी : चहात गुंगीचे औषध टाकून सहप्रवाशाला बेशुद्ध करून मोबाईल चोरी करणाऱ्या २५ वर्षीय आरोपीला वांद्रे लोहमार्ग पोलिसांनी अटक केली आहे. त्याच्याकडून १३ मोबाइल हस्तगत करण्यात आले आहेत. अटक आरोपीचे नाव हमीद खान आहे.
राजस्थानमधील बिकानेर येथील आजारी नातेवाईकाला पाहण्यासाठी दीपक शर्मा यांनी ९ मार्चला वांद्रे टर्मिनस येथून जाणाऱ्या वांद्रे ते बिकानेर गाडीचे आरक्षण केले होते.
शर्मा चालू तिकीट खिडक्यांच्या समोरील एका हॉलमध्ये बसले असता एक अनोळखी इसम त्यांच्याजवळ आला आणि ‘कहा जाना है’ असे विचारू लागला. तेव्हा आपण राजस्थानला जात असल्याचे शर्मा यांनी सांगितले. गाडी येण्यास वेळ असल्याचे सांगत त्या इसमाने शर्मा यांना चहा पिण्याचा आग्रह केला. हॉलबाहेरील चहाच्या दुकानाकडे दोघे गेले आणि तेथे त्यांनी चहा घेतला.
ते दोघेही चहा पिऊन पुन्हा हॉलमध्ये परतले. तेव्हा शर्मा बेशुद्ध पडले होते. तोपर्यंत त्यांच्याजवळील मुद्देमाल त्या इसमाने लंपास करून पोबारा केला.
वांद्रे टर्मिनसवर तैनात असलेल्या पोलिसांना शर्मा बेशुद्धावस्थेत असल्याचे दिसताच त्यांना तात्काळ भाभा रुग्णालयात दाखल केले. काही वेळाने शुद्धीवर आलेल्या शर्मा यांनी घडलेली घटना पोलिसांना सांगितली. पोलिसांनी स्थानकातील सी.सी.टी.व्ही. कॅमेरे तपासले आणि खबऱ्यांनी दिलेल्या माहितीच्या आधारे कुर्ला येथे राहणाऱ्या हमीद खानला पकडले.
त्याच्याकडे २ लाख ८ हजार रुपये किमतीचे १३ मोबाइल आणि अन्य मुद्देमाल सापडला. गुंगीच्या २० गोळ्या आणि पाच ते दहा गोळ्यांची पावडरही सापडली व पुढील तपास सुरू आहे..