अवधूत सावंत, प्रतिनिधी : जगविख्यात प्रसिद्ध उद्योगपती मुकेश अंबानी यांच्या घऱाबाहेर स्फोटकांनी भरलेलं स्कॉर्पिओ वाहन सापडलेल्या प्रकरणाचा तपास करणाऱ्या राष्ट्रीय तपास यंत्रणेने (एनआयए) अटक करण्यात आलेले पोलीस अधिकारी सचिन वाझे यांच्या ताब्यात अजून दोन लक्झरी वाहनं जप्त केली आहेत. यामधील एक कार रत्नागिरीमधील शिवसेना नेता विजयकुमार भोसले यांच्या नावावर रजिस्टर आहे. तर दुसरं वाहन मर्सिडीज बेन्झ आहे.
टाइम्स ऑफ इंडियाने यासंदर्भात वृत्त दिलं आहे
तीन दिवसांपूर्वी वाझेंकडून वापरण्यात येत असलेली मर्सिडीज पोलिसांकडून जप्त करण्यात आली. ठाण्यातील उद्योजक मनसुख हिरेन यांच्या मृत्यू प्रकरणाचा तपास करणाऱ्या एटीएसकडे सध्या अंबानींच्या घराबाहेर सापडलेल्या स्कॉर्पिओचा ताबा आहे.
मे. ठाणे सत्र न्यायालयात एटीएस कडून वाझेंची कोठडी मागितली जाऊ शकते. यादरम्यान एनआयए आणि एटीएस ने सी.सी.टी.व्हीं.ची तपासणी केली असता १७ फेब्रुवारीला मनसुख हिरेन आणि सचिन वाझे यांच्यात फोर्ट मुंबई जीपीओ जवळ मर्सिडीज कारच्या आत १० मिनिटं चर्चा झाल्याचं समोर आलं आहे.
मनसुख हिरेन ओला कॅबने दक्षिण मुंबईत गेले होते
आपली स्कॉर्पिओ मुलूंड – ऐरोली रोडला बंद पडल्याचा दावा त्यांनी केला होता. सी.सी.टी.व्ही मध्ये सचिन वाझे आपलं कार्यालय असणाऱ्या मुंबई पोलीस मुख्यालयातून मर्सिडीजमधून बाहेर पडताना दिसत आहेत. यानंतर त्यांचं वाहन सी.एस.एम.टी बाहेर सिग्लजवळ उभं असल्याचं दिसलं आहे.
सिग्नल सुरु झाल्यानंतर मर्सिडीज त्याच जागी उभी असते आणि वाझेंनी पार्किग लाईट सुरु करुन ठेवलेली असल्याचं सी.सी.टी.व्ही त दिसत आहे.
काही मिनिटांनी मनसुख हिरेन रस्ता ओलांडून येतात आणि मर्सिडीजमध्ये बसतात. यानंतर मर्सिडीज जीपीओच्या समोर उभी असल्याचं दिसत आहे. एनआयए आणि एटीएस ने आपल्या तपासाची चक्र वेगाने फिरवत ह्या गोष्टींची उकल करून समोर आणल्या आहेत.