प्रतिनिधी: अवधुत सावंत
बीड जिल्ह्यात रेमडेसीवीर इंजेक्शनच्या काळ्या बाजारबद्दल मोठ्या प्रमाणावर तक्रारी येत आहेत. इथल्या लाईफ लाइन हॉस्पिटलशी संलग्न लाईफलाईन मेडिकलमध्ये रेमडेसीवीरचा काळाबाजार पाहायला मिळाला. इथे एका इंजेक्शनसाठी तब्बल ५ हजार ४०० रुपये किंमत अकरण्यात आली.
या किमतीवर दोन इंजेक्शन विकल्याचे गुरुवारी समोर आले आहे. या प्रकरणात इंजेक्शन खरेदी करणारे संतोष सोहनी यांनी शहर पोलिसात तक्रार दिली आहे. बीड जिल्ह्यातच अन्न औषध प्रशासन विभागाच्या आशीर्वादानेच रेमडेसीवीर इंजेक्शनचा काळाबाजार सुरू असल्याचे गुरुवारी पुन्हा स्पष्ट झाले.
येथील लाईफ लाइन मेडिकलला रेमडेसीवीर इंजेक्शनचा साठा देण्यात आला होता. गुरुवारी संतोष सोहनी हे इंजेक्शन खरेदी करण्यासाठी त्या ठिकाणी गेले. त्यावेळी मेडिकलवाल्याने इंजेक्शनवर ५ हजार ४०० इतकी किंमत असल्याचे सांगितले. आणि त्यांच्याकडून दोन इंजेक्शनसाठी १० हजार ८०० रुपये घेतले. या प्रकारानंतर संतोष सोहनी यांनी बीड शहर पोलीसात तक्रार दिली आहे. या प्रकरणात चौकशी करुन पुढील कारवाई होईल असे शहर पोलीसांनी सांगितले.