संपादक: मोईन सय्यद / प्रतिनिधी: अवधुत सावंत
रेल्वे प्रशासनाची फसवणूक करण्याच्या इराद्याने फेसबुकद्वारे लोकांना संपर्क करून रेल्वे प्रवासाकरीता बृहन्मुंबई महानगर पालिकेचे बनावट ओळखपत्र बनविणाऱ्या इसमास गुन्हे शाखा, कल्याण युनिट, लोहमार्ग मुंबई पोलिसांनी अटक केली आहे.
याबाबत वृत्त असे आहे कि, लोहमार्ग मुंबई पोलीस आयुक्तालयाच्या हद्दीत फेसबुकद्वारे लोकांना संपर्क करून रेल्वे प्रवासाकरीता बनावट ओळखपत्र बनवून देण्याचे प्रकार वाढत असल्याची माहिती रेल्वे पोलिसांना मिळाली होती. सदर मिळालेल्या माहितीच्या अनुषंगाने पोलिसांनी गुप्त बातमीदाराकडून मिळालेल्या माहितीच्या आधारावर कल्याण रेल्वे स्थानक हद्दीत सापळा रचून सदर इसमास ताब्यात घेतले.
त्याच्याकडून मोबाईल फोन, बृहन्मुंबई महानगर पालिका, उप निबंधक, सार्वजनिक आरोग्य विभाग या कार्यालयाचा रबर स्टॅम्प, बनावटीकरण करण्याकरीता वापरात असलेले कोरे व काही भरलेले फॉर्म व बनावटीकरण केलेली ओळखपत्रे, ओळखपत्रे देऊन मिळालेली रोख रक्कम १,८००/- असा एकूण ३,३००/- रु. किंमतीचा मुद्देमाल जप्त करण्यात आला आहे.
तसेच सदर प्रकरणी त्याच्याविरुद्ध कल्याण रेल्वे पोलीस ठाण्यात गुन्हा दाखल करण्यात आला आहे.