मिरारोड: मिरारोडच्या नयानगर परिसरातील नरेंद्र पार्कच्या एका इमारतीत एकाच घरातील तीन जणांचे मृतदेह आढळल्याने सर्वत्र खळबळ उडाली आहे. नयानगरच्या नरेंद्र पार्कमधील जुही को-आप हा.सोसायटी या इमारतीच्या बिल्डिंग नंबर 2 सी विंगमधील तिसऱ्या मजल्यावरील सदनिका क्र.३२ मध्ये ही घटना घडली आहे. मृतदेहामध्ये आई, मुलगी व मुलगा यांचा समावेश आहे. पोलिसांनी तिन्ही मृतदेह ताब्यात घेऊन मुंबईतील जेजे रुग्णालयात शवविच्छेदनासाठी पाठवले आहेत.

मिरारोडमधील नयानगर परिसरातील नरेंद्र पार्क जुहू सोसायटीच्या तिसऱ्या मजल्यावरील सदनिका ३२ मध्ये तीन मृतदेह आढळून आले आहे. यामध्ये आईसह दोन मुलांनी झोपेच्या गोळ्या घेऊन आत्महत्या केल्याचा प्राथमिक अंदाज व्यक्त केला जात आहे.

सकाळी घरातील एका वयोवृद्ध व्यक्तीच्या उठल्यावर लक्षात आले की, आपल्या मुलीसह नातवंडे बेशुद्ध पडले आहेत याची माहिती त्यांनी शेजारी व्यक्तींना दिली. स्थानिकांनी नयानगर पोलिसांना माहिती दिली असता घटनास्थळी पोलिसांनी धाव घेतली आणि मृतदेह ताब्यात घेऊन भाईंदर पश्चिमेच्या पंडित भीमसेन जोशी रुग्णालयात दाखल केले होते. संशयास्पद मृत्यू असल्याने पोलिसांनी पंचनामा करून मृतदेह शवविच्छेदनसाठी मुंबईतील जेजे रुग्णालयात पाठवली आहेत.

आत्महत्या केलेली महिला आपल्या वडिलांच्या घरी राहत होती. एक वर्षापूर्वी महिलेचा घटस्फोट झाला होता. तेव्हापासून महिलेची अर्थिक परिस्थिती बिकट झाली असल्यामुळे ती महिला मानसिक तणावाखाली होती, अशी माहिती शेजारच्या लोकांनी दिली आहे. मृत महिलेला तिची दोन्ही मृत मुले गतिमंद असल्याने इमारतीच्या आवारात देखील मुलांना खेळण्यास पाठवत नव्हती.

महिलेच्या घरात झोपेच्या गोळ्या आढळून आल्या आहेत, त्यामुळे सदर महिलेने झोपेच्या गोळ्या स्वतः खाऊन मुलांना देखील देऊन आत्महत्या केल्याचा प्राथमिक अंदाज व्यक्त केला जात आहे. या संदर्भात पोलिसांनी प्रतिक्रिया देण्याचे टाळले असून शवविच्छेदनाचा अहवाल आल्यानंतर या तिघांचा नेमका मृत्यू कशामुळे झाला? हे स्पष्ट होणार आहे.