मुंबई: गेली २ वर्षे आपण कोविड -१९ महामारीशी दोन हात करीत असल्यामुळे अनेक शल्यचिकित्सा पुढे ढकलल्या होत्या यामध्ये प्लास्टिक व कॉस्मेटिक शस्रक्रियांचा समावेश होता, आता कोविड -१९ चा धोका कमी झाला असून मुंबईत अनेक शस्रक्रिया होत असून यामध्ये विविध शहरातून व इतर देशातून येणाऱ्या नागरिकांचा समावेश आहे.

घाटकोपर येथील झायनोव्हा शाल्बी हॉस्पिटलमध्ये अशीच एक चेहरा सुधारण्यासाठी ३२ वर्षाच्या तरुणावर ११ तासाची सलग शस्रक्रिया करण्यात आली. लंडन येथिल प्रशिक्षित ओरल व मॅक्सिलोफेशियल सर्जन डॉ सम्राट तावडे व ओटोरहिनोलॅरिन्गोलॉजिस्ट डॉ. कौस्तुभ सरवदे यांनी हि शस्त्रक्रिया यशस्वीरीत्या पार पाडली. याविषयी अधिक माहिती देताना डॉ सम्राट तावडे म्हणाले, ” कुर्ला येथी राहणाऱ्या ३२ वर्षीय कुमारची जबड्याच्या सांध्याची वाढ आणि कानाच्या कालव्यांभोवती हाडांची वाढ जास्त झाल्यामुळे त्याची हनुवटी एका बाजूला वळली होती त्यामुळे जेवताना अथवा बोलताना खूप वेदना होत होत्या. कोणत्याही वेदनाशामक गोळ्यांनी या वेदना कमी होत नव्हत्या त्यात कोरोनाची साथ आल्यामुळे कुमार यां २ वर्षे या वेदना सहन कराव्या लागल्या.

कुमारच्या चेहऱ्याची शस्रक्रियाकरण्यापूर्वी संपूर्ण चेहऱ्याची ३D मॉडेलिंगद्वारे प्रतिकृती तयार करण्यात आली, त्याचा चेहरा सरळ करण्यासाठी नेमकी जी शस्त्रक्रिया करायची होती ती अंतिम परिणाम पाहण्यासाठी आम्ही या ३D मॉडेलवर केली त्यामुळे आम्हाला त्यात अचूकता कळली कारण अवास्तव वाढलेली जबड्याचे सांधे काढून टाकणे, जबड्याचा डावा कोन काढणे, कानाच्या हाडांची वृद्धी कमी करणे आणि कानाच्या कालव्याला पुरेशा आकारासाठी आकार देणे यासह अनेक प्रक्रियांचे नियोजन करण्यात आले होते.

यामध्ये त्याच्या दातांना सुरक्षित करणे गरजेचे होते. हि शस्त्रक्रिया सलग ११ तास चालली व आता कुमारच्या चेहऱ्यामध्ये चांगली सुधारणा झाली आहे.” शस्त्रक्रियेनंतर कुमार आनंदी असून तो आता आत्मविश्वासाने लोकांना भेटू शकतो अशी भावना त्यांनी व्यक्त केली.किशोरवयापासून कुमार याला चेहऱ्यामुळे मित्र मैत्रिणींच्या चेष्ठामस्करीला सामोरे जावे लागले होते. कुमार याने डॉ. सम्राट तावडे, डॉ. कौस्तुभ सरवदे, बिजनेस हेड आशिष शर्मा आणि संपूर्ण झायनोव्हा शाल्बी हॉस्पिटल टीमचे आभार मानले.