संपादक: मोईन सय्यद / प्रतिनिधी: अवधुत सावंत
शेतकऱ्यांच्या आत्महत्या रोखण्यासाठी व शेतकऱ्यांना शेती व्यवसायात प्रोत्साहन मिळावे यासाठी केंद्र सरकार तसेच राज्यसरकार नेहमीच प्रयत्नशील असते. सध्या देशासह महाराष्ट्रात महागाईचा आगडोंब उसळला आहे. केंद्र सरकारकडून मागच्या दोन महिन्यात डिझेलच्या दरात तब्बल १० रुपयांची वाढ केली गेली. सातत्याने इंधनाच्या होणाऱ्या वाढीचा सर्वसामान्यांना मोठा फटका बसत असून त्यामुळे नागरिकांमध्ये नाराजीचा सूर उमटत आहे त्यात शेतकरीही हवालदिल झाला आहे.
विशेष म्हणजे सध्या राज्यात इंधनाचे दर मोठ्या प्रमाणात वाढले असून राज्यात सरासरी डिझेलचे दर १०५ रुपयांच्या आसपास पोहोचले आहे. डिझेलच्या या मोठ्या दरवाढीमुळे शेतकऱ्यांना मोठ्या आव्हानाला तोंड द्यावे लागत आहे. शेतीच्या मशागतीच्या कामांचे दर देखील अव्वाच्या सव्वा झाले आहेत. यावर उपाय म्हणून राज्य सरकारतर्फे ‘ट्रॅक्टर आमचा डिझेल तुमचे’ अशा नावाची एक नवी योजना राबवण्यात येत आहे. या योजनेद्वारे शेतकऱ्यांना मोठा दिलासा मिळत असून मोठा फायदा होणार आहे.
विधवा, शेतकरी आत्महत्याग्रस्त कुटुंबातील महिला शेतकऱ्यांना पेरणी ते कापणी दरम्यान आर्थिक सहाय्य व्हावे, व त्यांचा उत्पादन खर्च कमी व्हावा यासाठी ‘ट्रॅक्टर आमचा, डिजेल तुमचे’, हा उपक्रम राबविण्यात येत आहे. यामुळे या महिला शेतकऱ्यांना आर्थिक स्थैर्य लाभावे. ही योजना देशात प्रथमच अकोला जिल्ह्यात राबविण्यात येत असून ही योजना राज्याला व देशाला मार्गदर्शक ठरणार आहे. याबाबत कामगार राज्यमंत्री नेते बच्चू कडू यांनी माहिती दिली आहे.
शेतकरी कुटुंबात पतीच्या मृत्युनंतर कुटुंबाचा उदरनिर्वाह वेळ महिलांवर येते. पण नांगरणी, वखरणी, पंजी आणि पावसाळा सुरू झाल्यावर पेरणीसाठी पैसा आणायचा कुठून ? असे अनेक प्रश्न त्यांच्या सामोर उभे ठाकतात. त्यात त्यांना सहाय्य व्हावे यासाठी, हा उपक्रम प्रायोगिक तत्वावर सुरु केला असल्याची माहिती कामगार राज्यमंत्री नेते बच्चू कडू यांनी प्रसिद्धीमाध्यमांना दिली.