मिरा भाईंदर: कोणत्याही प्रकारची राजकीय मान्यता नसताना देखील एकनाथ शिंदे गटाने आपणच अधिकृत शिवसेना असल्याचा दावा करून राज्यभरात पदाधिकाऱ्यांच्या नियुक्त्या करण्याचा सपाटा लावला आहे.
अशाच प्रकारे शिंदे गटाने मीरा भाईंदर शहराची कार्यकारिणी देखील घोषित केली असून त्या कार्यकारिणीत अनेक वादग्रस्त नावे देखील सामील असल्याचे उघड झाले आहे.
नव्यानेच जाहिर केलेल्या कार्यकारिणीत १४५ मिरा-भाईंदर शिवसेना महिला संघटक पदी काँग्रेसच्या गिरा व्यास यांना नियुक्त केल्याचे जाहीर करण्यात आले आहे. मात्र गिरा व्यास यांनी काँग्रेस पक्ष सोडला नसून त्यांचे नाव शिंदे गटाच्या शिवसेनेच्या कार्यकारिणीत सामील करणे पुर्णपणे चुकीचे असून दिशाभूल करणारे आहे असे स्पष्टीकरण काँग्रेसचे प्रवक्ते प्रकाश नागणे यांनी दिले आहे.
गिरा व्यास ह्या अनेक वर्षांपासून काँग्रेस पक्षामध्ये सक्रिय असून त्यांनी शिंदेंसेनेत प्रवेश केलेला नाही. शिवसेनेचा हा अंतर्गत वाद असून आमची सेना हीच खरी शिवसेना आहे हे दाखविण्याचा केविलवाणा प्रयत्न चालू आहे, निवडणूक आयोगाकडे निवडणूक चिन्ह मिळविण्यासाठीच अश्या प्रकारची बोगस नियुक्ती दाखवण्याचा प्रयत्न केला जात असल्याचा आरोप काँग्रेस प्रवक्ते प्रकाश नागणे यांनी केला असून गिरा व्यास या काँग्रेस मध्येच आहेत असे स्पष्ट केले आहे.
मिरा भाईंदर शहरातील शिंदे गटाने आपल्या कार्यकर्त्यांची संख्या मूळ शिवसेनेपेक्षा जास्त असल्याचे भासविण्यासाठी नव्याने जाहीर केलेल्या कार्यकारिणीमध्ये अशाच प्रकारे अनेकांची नावे परस्पर जाहीर केली असल्याने त्यावर आता एक नविनच वाद निर्माण होण्याची शक्यता वर्तवण्यात येत आहे.