संपादक: मोईन सय्यद / मिरा भाईंदर, प्रतिनिधी:

मिरा भाईंदर शहरातील प्रभागच्या भाजप नगरसेविका मेघना रावल यांच्या मालकीच्या ‘द मेरियाड’ या हॉटेलमध्ये शहरात कडक लॉकडाउन असून देखील राजरोसपणे वेश्या व्यवसाय चालू होता. पोलिसांनी या हॉटेलवर धाड टाकून पाच मुलींची सुटका केली आहे. लॉजिंग बोर्डिंगच्या नावाखाली भाजप नागरसेविका मेघना रावल यांच्या मालकीचे असलेले ‘द मेरियाड’ या हॉटेलमध्ये चक्क कुंटणखाना चालवला जात असून दलाला मार्फत टिव्ही मालिकांत काम करणाऱ्या मुलीं पासून ते मॉडेलिंग करणाऱ्या मुली याच हॉटेलमध्ये ग्राहकांना पुरविल्या जात असल्याची माहिती परिमंडळ-1 चे पोलीस उपायुक्त अमित काळे यांना मिळाली होती. माहितीची खात्री केल्या नंतर अमित काळे यांच्या पथकाने या हॉटेलवर धाड टाकून पाच मुलींची सुटका केली आहे.

पोलिसांनी सुटका केलेल्या मुली भोजपुरी चित्रपटात काम करायच्या तर काही मुलींनी टिव्ही मालिकांत देखील काम केले आहे. कोरोना महामारीमुळे लॉकडाउन झाल्यामुळे चित्रपट सृष्टीची कामे बंद पडल्याने या क्षेत्रावर अवलंबून असलेल्या अनेकांवर उपासमारीची पाळी आली आहे. याच परिस्थितीचा गैरफायदा घेत काही दलालांनी चित्रपट सृष्टीत काम करणाऱ्या मुलींना वेश्या व्यवसाय करण्यास भाग पाडले असून पोटाची खळगी भरण्यासाठी नाईलाजाने या मुलींवर वेश्या व्यवसाय करण्याची पाळी आली आहे अशी माहिती सूत्रांनी दिली आहे. पोलिसांनी धाड टाकून रामरतन कारवा (30) आणि परबत मानचामरिया (42) या दोन दलालांना अटक केली आहे.

गेल्या काही वर्षांत मिरा भाईंदर शहरातील लॉजिंग बोर्डिंगच्या नावाखाली वेश्या व्यवसाय, जुगाराचे अड्डे, डान्सबार अशा अनेक अनैतिक व्यवसायात भाजप नगरसेवक आणि पदाधिकाऱ्यांचा मोठ्या प्रमाणात सहभाग असल्याचे समोर आल्याने पक्षाची प्रतिमा खूपच डागाळलेली असून ‘पार्टी विथ डिफरेन्स’ म्हणून नैतिकतेचा आव आणणाऱ्या भाजपचा पुन्हा एकदा खरा चेहरा लोकांसमोर आला असल्याची टीका विरोधी पक्षाच्या नेत्यांकडून केली जात आहे.

गेल्या दोन महिन्या पासून शहरात संपूर्ण लॉकडाउन लागले असून सर्व हॉटेल बियरबार, लॉजिंग बोर्डिंग बंद असताना देखील भाजप नागरेविकेच्या या हॉटेलमध्ये मात्र राजरोसपणे वेश्या व्यवसाय कसा काय चालू होता? या बद्दल आश्चर्य व्यक्त केले जात आहे. सर्वात धक्कादायक बाब म्हणजे मिरा भाईंदर महानगरपालिकेच्या एका बड्या अधिकाऱ्याची देखील या हॉटेलमध्ये भागीदारी असल्याचे बोलले जात असून त्या अधिकाऱ्याच्या आशीर्वादानेच या हॉटेलमध्ये असे अनैतिक कार्य केले जात असल्याची माहिती सूत्रांनी दिली आहे.