संपादक: मोईन सय्यद/पालघर प्रतिनिधी
पालघर: मुंबई-वसई महामार्गा लगत वर्सोवा खाडी किनाऱ्याच्या तसेच ससू नवघर, मालजी पाडा परिसरात कांदळवन क्षेत्र भरणी माफियांनी मोठ्या प्रमाणात नष्ट केले आहे. मात्र पालघर जिल्ह्यातील महसूल विभाग, वन विभाग आणि वसई-विरार महानगरपालिकेचे अधिकारी मात्र याकडे जाणीवपूर्वक दुर्लक्ष करीत असल्याचे स्पष्ट झाले आहे.
या ठिकाणी मोठ्या प्रमाणात बेकायदेशीर बांधकामे, शेड आदी बांधकामे झालेली आहेत.
मोठ्या प्रमाणात झालेल्या भरावामुळे राष्ट्रीय महामार्ग पावसाळ्यात पाण्या खाली बुडत आहे.
२०१८ पासून या प्रकरणी अनेक तक्रारी होऊन देखील महसूल व महापालिका यांनी बेकायदेशीर बांधकामे हटवली नाहीत किंवा गुन्हे दाखल केले नाहीत. तसेच याठिकाणी झालेला बेकायदेशीर मातीचा भराव देखील काढलेला नाही.
तब्बल अडीच वर्षांनी आज शुक्रवारी स्थळपाहणी आयोजित करण्यात आली होती. परंतु आज ही केवळ दोन ठिकाणीच पाहणी झाली. केवळ पाहणीचा फार्स करीत असल्याचे दिसत होते.
वर्सोवा खाडी किनारी तर सरकारी जागेत कांदळवन नष्ट करून भूखंड तयार करण्यात आला आहे. तेथे असंख्य मोटार पंप लावण्यात होते. या ठिकाणी रेतीचे भरलेले ७ डंपर जागेवर सापडले. त्याच प्रमाणे या भागात मोठ्या प्रमाणात बेकायदेशीर शेड आणि बांधकामे झाली आहेत.
प्रांत अधिकारी स्वप्नील तांगडे, वसईच्या तहसीलदार उज्वला भगत, वालीवचे पोलीस निरीक्षक पाटील सह पर्यावरण संरक्षणसाठी कार्यरत कार्यकर्ते धीरज परब सह मोईन सय्यद, इरबा कोनापुरे आदी उपस्थित होते.
या प्रकरणी मा उच्च न्यायालयाच्या आदेशाचा अवमान व उल्लंघन तसेच पर्यावरण संरक्षण कायदा, भादंसं व महसूल अधिनियमा नुसार गुन्हा दाखल करावा. सर्व बांधकामे काढून भराव काढून टाकावा व कांदळवन पूर्ववत करावे. जागेवर आढळलेली वाहने साहित्य जप्त करावे अशी मागणी धीरज परब यांनी केली आहे.
येथील भरणी माफिया व भूमाफियांच्या मुसक्या आवळून कठोर कायदेशीर कारवाई महसूल, पोलीस व पालिकेच्या अधिकाऱ्यांनी करावी अशी मागणी सुद्धा केली आहे.
त्याच बरोबर कांदळवन क्षेत्रात व 50 मीटर बफर झोनमध्ये मातीचा भराव व बांधकामे होण्यास जबाबदार असलेल्या महसूल, पालिका अधिकाऱ्यांवर देखील कारवाई करण्याची मागणी केली आहे.