१ लाख २० हजार तीनशे रुपये रोख रक्कमेसह तीन लाख एकतीस हजार रुपयाचा मुद्देमाल जप्त!
भाईंदर, प्रतिनिधी : मीरा भाईंदर, वसई विरार पोलीस आयुक्तालय हद्दीत भाईंदर पश्चिम येथे स्टेशन जवळ एका फ्लैटमध्ये सुरू असलेल्या जुगाराच्या अड्ड्यावर भाईंदर पोलिसांनी धाड टाकून २० जणांना पोलिसांनी ताब्यात घेतले असून दोन जण फरार झाले आहेत. घटनास्थळावरून एक लाख वीस हजार तीनशे रोख रक्कम, मोबाईल फोन, वही, पत्ते व इतर साहित्य असा एकूण सुमारे तीन लाख एकतीस हजार रुपयांचा मुद्देमाल पोलिसांनी जप्त केला. एकूण २२ जणांविरुद्ध गुन्हा दाखल करण्यात आला आहे त्यापैकी वीस जणांना अटक करण्यात आली आहे तर दोन इसम फरार आहेत. भाईंदर पोलीस फरार आरोपींचा शोध घेत आहेत.
भाईंदर पश्चिम येथील स्टेशन जवळ असलेल्या शांती दर्शन इमारतच्या खोली क्रमांक २०१, दुसऱ्या मजल्यावर पत्त्याचा जुगार सुरू असल्याची गोपनीय माहिती परिमंडळ-१ चे नवनियुक्त पोलीस उपायुक्त राहुल चव्हाण यांना मिळाली होती त्यानुसार पोलीस उपायुक्त राहुल चव्हाण यांनी भाईंदर पोलीस ठाण्याचे वरिष्ठ पोलीस निरीक्षक जितेंद्र कांबळे यांना आदेश देऊन सोमवारी मध्यरात्री दीडच्या सुमारास सापळा रचून छापेमारी करण्यात आली. दरम्यान जुगाराचा अड्डा सुरू असल्याचे प्रत्यक्षात दिसून आले. घटनास्थळावरून वीस जणांना पोलिसांनी मध्यरात्री ताब्यात घेऊन पोलीस ठाण्यात नेण्यात आले. या खोलीमध्ये रोख रक्कम १ लाख २० हजार तीनशे रुपये, तसेच जुगार खेळण्याची पत्ते, वही, पेन, मोबाईल व इतर साहित्य एकूण तीन लाख एकतीस हजार रुपयांचा मुद्देमाल हस्तगत करण्यात आला आहे.
गुप्त सूत्रांकडून मिळालेल्या माहितीनुसार, सदरचा जुगाराचा अड्डा गेल्या अनेक महिन्यापासून सुरु असल्याचं बोलले जात आहे. कारवाईमध्ये एकूण २२ जणांविरुद्ध गुन्हा दाखल करण्यात आला असून त्यापैकी वीस जणांना अटक करण्यात आली आहे. यामध्ये मूळ सदनिका मालक यांना देखील आरोपी करण्यात आले आहे. दोन आरोपी अद्याप फरार असून त्यांचा शोध भाईंदर पोलीस करत असल्याची माहिती वरिष्ठ पोलीस निरीक्षक जितेंद्र कांबळे यांनी दिली.
ही कारवाई सहाय्यक पोलीस निरीक्षक आनंद गायकवाड, सागर चव्हाण, हेड कॉन्स्टेबल अभिजीत ठाकूर, रामनाथ शिंदे यांच्या संयुक्त पथकाने केली आहे.
मीरा भाईंदर वसई विरार पोलीस आयुक्तालय अंतर्गत काशीगांव पोलीस ठाण्याच्या हद्दीत रवी ग्रुप, पंधरा नंबर बस्टॉप जवळ तसेच नवघर पोलीस ठाण्याच्या हद्दीतील हनुमान मंदिर जवळ स्पोर्ट्स कॉम्प्लेक्स जवळील कमर्शियल इमारतीमध्ये त्याच प्रमाणे काशिमीरा पोलीस ठाण्याच्या हद्दीतील काशीगांव परिसरात देखील अनेक ठिकाणी जुगाराचे अड्डे राजरोसपणे सुरु असल्याची माहिती सूत्रांनी दिली असून आता या जुगाराच्या अड्डयांवर पोलीस कधी कारवाई करणार? याकडे लक्ष लागून राहिले आहे.