संपादक: मोईन सय्यद / प्रतिनिधी: अवधुत सावंत
कल्याण येथे रात्रीच्या वेळेस हायवे रोडवर लूटमार करणाऱ्या २ सराईत लुटमारांना बाजारपेठ पोलिसांनी अटक केली आहे.
याबाबत वृत्त असे आहे कि, मुनवर हुसेन अब्दुल रहमान शेख हे ओला कॅब ड्रायव्हर डोंबिवली येथे पॅसेंजर सोडून कल्याणला जायला निघाले असताना गोविंदवाडी बायपास येथील ए.पी.एम.सी मार्केट गेट पासून पुढे गेल्यावर फानूस धाब्यासमोरील रस्त्यावर स्पीड ब्रेकरजवळ कल्याण (प) येथे दोन अनोळखी इसमांनी त्यांना कॅब थांबविण्याचा इशारा करून ते ओला कॅब मध्ये बसले आणि थोड्यावेळाने त्यातील एका इसमाने त्यांच्या मानेवर चाकू लावून मारहाण करून त्यांच्याकडील २०४०/- रु. रोख रक्कम व २ मोबाईल फोन असा माल जबरीने काढून घेतला. त्यानंतर त्यातील एकाने कॅब चालविण्यास सुरुवात करून सदर ड्रायव्हरला आणखी पैशांची मागणी करून त्यांना एटीएम मशीन मधून पैसे काढण्यासाठी कल्याण स्टेशनच्या रस्त्यावर येत असताना कॅब चालकाला पोलीस दिसल्याने त्यांनी मदतीला आरडाओरड केली असता ड्रायव्हर सीट वर बसलेल्या इसमाने सदर ड्रायव्हरला मारहाण करून गाडीतून उतरून दिले आणि ते कल्याण स्टेशनच्या दिशेने पळून गेले. सदर २ इसमांनी ओला कॅब चालकाचा ५,६५,०३०/- रु. कीं माल जबरी चोरी करून नेला.
या घटनेबाबत बाजारपेठ पोलीस ठाण्यात गुन्हा दाखल करण्यात आला होता. सदर गुन्ह्याच्या अनुषंगाने पोलिसांनी तपास करून दुर्गाडी किल्ल्याच्या शेजारी असलेल्या जुन्या खाडी पुलाजवळ सापळा रचून सदर दोघांना अटक केली. त्यांच्याकडून गुन्ह्यात जबरी चोरी केलेला मुद्देमाल हस्तगत करण्यात आला आहे. तसेच गुन्हा करण्यासाठी वापरलेले हत्यार देखील जप्त करण्यात आले आहे.
सदरची यशस्वी कामगिरी पोलीस आयुक्त विवेक फणसळकर, ठाणे शहर, सह पोलीस आयुक्त सुरेशकुमार मेकला, ठाणे शहर, अति. पोलीस आयुक्त पूर्व प्रादेशिक विभाग, कल्याण दत्तात्रय कराळे, युनिट ३ चे पोलीस उपायुक्त विवेक पानसरे, सहा.पोलीस आयुक्त कल्याण विभाग अनिल पोवार यांच्या मार्गदर्शनाखाली बाजारपेठ पोलीस स्टेशनचे वपोनिरी. यशवंत चव्हाण, पोनि. सुनील पवार, मसपोनिरी. कांदळकर, सपोनिरी अरुण घोलप, पोहवा. टी के पावशे, पोहवा. यु सावंत, पोहवा. लीकडे, पोलीस नाईक. सचिन साळवी, पोलीस नाईक. बी.आर.बागुल, पोलीस नाईक पी.बाविस्कर, पोलीस नाईक जी.पोटे, पोलीस शिपाई. आर.एम.सांगळे यांनी यशस्वीरित्या पार केली आहे.