संपादक: मोईन सय्यद / प्रतिनिधी: अवधुत सावंत
‘खेलो इंडिया’ युवा क्रीडा स्पर्धेअंतर्गत हरयाणा येथे सुरु असलेल्या राष्ट्रीय खो-खो स्पर्धेच्या उपांत्य सामन्यात महाराष्ट्राच्या मुलींनी पश्चिम बंगालचा तर ओरिसाने पंजाबचा पराभव करुन अंतिम फेरी गाठली. महाराष्ट्राच्या मुलांनी दिल्लीचा तर ओरिसाने पश्चिम बंगालचा पराभव करत अंतिम फेरीत प्रवेश केला.
दुपारच्या सत्रात झालेल्या सामन्यांमध्ये महाराष्ट्राच्या मुलींनी प. बंगालचा ९-८ (९-३) असा एक डाव १ गुणाने पराभव केला. महाराष्ट्रने प्रथम आक्रमण करताना पश्चिम बंगालचे ९ खेळाडूंना बाद केले होते. त्यानंतर फॉलोऑन देऊनही पश्चिम बंगालला तेवढे खेळाडू बाद करता आले नाहीत. यामध्ये महाराष्ट्रातर्फे अश्विनी शिंदेने २:१ मि. संरक्षण केले, प्रिती काळेने २:२० मि. पळतीचा खेळ करत १ खेळाडू बाद केला. दिपाली राठोडने २:३० मि. नाबाद संरक्षणाचा खेळ केला. मयुरी पवारने २:३० मि., जान्हवी पेठेने १:४० मि. पळतीचा खेळ केला. संपदा मोरेने ३ खेळाडू बाद करताना १:३० मि. संरक्षणाचा खेळ केला. त्यामुळे महाराष्ट्रच्या मुलींनी सहज अंतिम फेरी गाठली. पश्चिम बंगालतर्फे इशिता विश्वास २:२० मि. संरक्षण करत १ खेळाडू बाद केला.
मुलींच्या दुसर्या उपांत्य सामन्यात ओरिसाने पंजाबचा ९-८ (९-३) असा १ डाव १ गुणाने विजय मिळवला. विजयी ओरिसातर्फे एम. कदंबिनीने १:५० मि. तर एम अर्चनाने १:५० मि. संरक्षण करत ३ खेळाडू बाद केले. पंजाब संघातर्फे गुरुवीर कौरने १:५० मि. आणि सनप्रित कौरने १:३० पळतीचा खेळ केला.
उपांत्य सामन्यात मुलांमध्ये महाराष्ट्राने दिल्लीचा १५-९ (१५-५) असा १ डाव ६ गुणांनी पराभव केला. विजयी संघातर्फे आदित्य कुडाळेने २.३० मि. खेळ करत १ गडी, मिलिंद आर्यनने २.३० मि. नाबाद खेळी करत १ गडी तर ॠषिकेश शिंदेने २.१० मि. खेळ करत २ गडी बाद केले. सुफियान शेख आणि अक्षय तोगरेने प्रत्येकी ३ गडी बाद करत आक्रमणाची धुरा उत्तमरितीने सांभाळली. पराभूत दिल्लीतर्फे सत्यमने १.४० मि., अजय कुमारने १.३० मि. खेळ करत २ गडी बाद केले.