संपादक: मोईन सय्यद / प्रतिनिधी: अवधुत सावंत

डोंबिवली-कल्याण शहरातील यंदा सार्वजनिक १५ व खासगी ८ हजार ८० घरगुती गणेशमूर्तीचे तर ३ हजार ४६७ गौरींचे ‘गणपती बाप्पा मोरया, पुढच्या वर्षी लवकर‘ या जय घोषात विसर्जन करण्यात आले. दरम्यान, निर्माल्यासाठी सर्वच ठिकाणी विशेष व्यवस्था करण्यात आली होती. यामुळे पर्यावरण पूरक वातावरणात गणपतीचे विसर्जन पार पडले.

डोंबिवलीमध्ये रेतीबंदर गणेश घाट, कुंभारखाण पाडा, चोळे गाव, कचोरे तलावात तर कल्याणच्या दुर्गाडी किल्ल्यानजीकचा गणेश घाट, काळा तलाव, गौरी पाडा तलाव, आधारवाडी जेल तलाव याठिकाणी सार्वजनिक आणि घरगुती गौरी-गणपतीचे विसर्जन पार पडले.

घरगुती गणपती विसर्जनासाठी कृत्रिम तलावांचाही व्यवस्था करण्यात आली होती. पण बऱ्याच गणपती भक्तांनी तलावात विसर्जन करण्यास प्राधान्य दिले. गेल्या पाच दिवसांपासून डोंबिवली-कल्याण मध्ये गणरायाची भक्तिभावाने पुजा-अर्चा, भजन आणि कीर्तन यामध्ये भक्तिमय वातावरण निर्माण झाले होते. सोमवारी गौरी गणपतींना निरोप देण्यासाठी ढोल-ताशांचा गजरात, बॅन्ड, बॅन्जो आणि डिजे च्या तालावर लाडक्या गणपती बाप्पाची भव्यदिव्य मिरवणूका काढण्यात आल्या.

या वेळी कोणताही अनुचित प्रकार आणि दुर्घटना घडू नये म्हणून ठिकठिकाणी प्रत्येक चौका चौकात आणि खाडी परिसरात कडक आणि चोख पोलीस बंदोबस्त तैनात करण्यात आला होता.