लोकहित न्युज

संपादक: मोईन सय्यद / प्रतिनिधी: अवधुत सावंत

सिडनी येथे सुरू असलेल्या जागतिक इनडोअर क्रिकेट महासंघाने (डब्लूआयसीएफ) ऑस्ट्रेलियात आयोजित केलेल्या इनडोर क्रिकेट विश्वचषक स्पर्धेत भारताने इंग्लंडचा २९ धावांनी पराभव करून विजयी प्रारंभ करून दिला. आज झालेल्या सामन्यात भारताने प्रथम फलंदाजी करताना १६ षटकात ९९ धावा केल्या तर इंग्लंडला ७० धावाच करता आल्या.

भारताच्या १६ षटकांच्या सामन्यात पहिल्या ४ षटकात पहिल्या जोडीला फक्त ६ धावाच करता आल्या (बाद झाल्यावर प्रत्येक वेळी ५ रन वजा होतात). मात्र नंतरच्या तीन जोड्यांनी अनुक्रमे ३०, २९ व ३४ धावांची भर घातल्याने भारताला ९९ धावांचा पल्ला गाठता आला. तर भारतीय गोलंदाजांनी इंग्लंडच्या चार जोड्यांना अनुक्रमे १९, १५, १६ व २० धावांवर रोखल्याने भारताला मोठा विजय साजरा करता आला. इंग्लंड फलंदाजीच्या वेळी दुसर्‍या व तिसर्‍या चार-चार षटकात भारतीय गोलंदाजांनी कमालीची कामगिरी करताना १५ व १६ धावांवर रोखले हाच भारतीय विजयाचा टर्निंग पॉइंट ठरला. या षटकांदरम्यान भारतीय क्षेत्ररक्षण कमालीचे चपळ व दक्ष वाटले.

भारता तर्फे दैविक राय (१) व यतीश चन्नाप्पा (५) हि सलामीची जोडी खेळायला उतरली पण या जोडीला काही विशेष कामगिरी करता आली नाही. दुसऱ्याच्या जोडीतील विजय हनुमंतरायाप्पा (१०) व अफ्रोज पाशा (२०) तिसऱ्या जोडीतील गिरीश गोपाल (९) व नमशीद व्हि. (२०) आणि शेवटच्या जोडीतील अरिज अजीज (१६) व सुरज रेड्डी (१८) यांनी केलेल्या कामगिरीच्या जोरावर भारताने मोठा विजय संपादन केला.

इंग्लंडच्या पहिल्या जोडीमधील जायडेन शाॅर्ट (९) व माइक गॅलर (१०) दुसऱ्या जोडीमधील नातं रिमिंगटोन (६), टॉम क्लार्क (९), तिसऱ्या जोडीतील मॅट गेलर (२०) लिम ब्रेजर (-४) तर शेवटच्या जोडीतील नव पटेल (१७) व ऑलिवर ग्रीन (३) यांना प्रभावी कामगिरी करता आली नाही.

भारताच्या सुरज रेड्डीने तीन फलंदाज बाद केले, तर अफरोज पाशा, गिरीश गोपाल व दैविक राय यांनी प्रत्येकी दोन-दोन फलंदाजांना बाद केले. या सामन्यात ‘प्लेयर ऑफ द मॅच’ म्हणून भारताच्या सुरज रेड्डी ला पारितोषिक देऊन गौरवण्यात आले.

संपादक: मोईन सय्यद / प्रतिनिधी: अवधुत सावंत

जागतिक इनडोअर क्रिकेट महासंघाने (डब्लूआयसीएफ) च्या वतीने ८ ते १५ ऑक्टोबर २०२२ या कलावधीत इनडोर क्रिकेट विश्वचषक ऑस्ट्रेलियात आयोजित केला आहे. या स्पर्धेत भारतासह, श्रीलंका, ऑस्ट्रेलिया, इंग्लंड, न्यूझीलंड, द.आफ्रिका, यूएई व सिंगापूर हे आठ संघ सहभागी झाले आहेत. तर २२ वर्षाखालील गटात भारतासह ऑस्ट्रेलिया, द.आफ्रिका व न्यूझीलंड हे संघ सहभागी झाले आहेत. २०१४ साली न्यूझीलंड व २०१७ साली दुबई येथे झालेल्या विश्वचषक स्पर्धेत भारतीय संघ चौथ्या स्थानी राहिला होता. त्यामुळे या विश्वचषक स्पर्धेत भारतीय संघातील खेळाडूंवर मोठी कामगिरी करण्याची जबाबदारी असेल.

पुरुषांचा भारताचा पहिला सामना इंग्लंड विरुध्द ९ ऑक्टो. रोजी भारतीय वेळेनुसार सकाळी ११:३० वाजता सुरू होणार आहे. दूसरा सामना सिंगापूर विरुध्द १० ऑक्टो. रोजी सकाळी ७:३० वाजता होणार आहे. तिसरा सामना विश्वचषक विजेतेपदाचा दावेदार असलेल्या ऑस्ट्रेलिया विरुध्द १० ऑक्टो. रोजी दुपारी १:३० वाजता होणार आहे. चौथा सामना यूएई विरुध्द ११ ऑक्टो. रोजी सकाळी ५:३० वाजता होणार असून पाचवा सामना त्याच दिवशी श्रीलंके विरुध्द दुपारी १:३० वाजता होणार आहे. सहावा सामना १२ ऑक्टो. रोजी दुपारी १:३० वाजता न्यूझीलंड विरुध्द होणार असून सातवा व शेवटचा साखळी सामना १३ ऑक्टो. रोजी दुपारी १:३० वाजता द.आफ्रिके विरुध्द होणार आहे. १४ ऑक्टो. रोजी उपांत्य व १५ ऑक्टो. रोजी अंतिम सामने होतील.

२२ वर्षाखालील भारतीय संघ ९ ऑक्टो. रोजी भारतीय वेळेनुसार सकाळी ३:३० वाजता ऑस्ट्रेलिया विरुध्द खेळणार आहे. १२ ऑक्टो. रोजी सकाळी ७:३० वाजता द. आफ्रिके विरुध्द व १३ ऑक्टो. रोजी सकाळी ७:३० वाजता न्यूझीलंड विरुध्द खेळेल.

भारतीय पुरुष संघ : गिरीश के.जी (कर्णधार), धनुश भास्कर (उप-कर्णधार), एरीज अजीज, दैविक राय, खिजर अहमद, रुमान चौधरी, मोहसिन नदाम्माल, नामशीद वायप्रथ, सूरज रेड्डी, विजय गौडा, यतीश गौडा, संदीप मायांना (प्रशिक्षक) व एम. एस. पुंजा (व्यवस्थापक) या स्पर्धेमध्ये मुख्य सहकारी असतील.