लोकहित न्युज

संपादक: मोईन सय्यद / प्रतिनिधी: अवधुत सावंत

राज्यातील सरकार हे बोलाची कडी आणि बोलाच भात आहे. कोट्यवधीची घोषणा सरकार करत आणि शेतकऱ्यांच्या खात्यात एक रुपयाही अजून जमा झाला नाही, हे सरकार धनदांडग्यांचे आहे, गुजरातला मदत करणारे आहे. अशी टीका विधान परिषदेचे विरोधी पक्ष नेते अंबादास दानवे यांनी केली आहे. ते अकोला येथे जिल्हाधिकारी कार्यालयात आढावा बैठकीसाठी आले होते यावेळी त्यांनी पत्रकारांशी संवाद साधला.

सध्याचे सरकार स्थगितीचे सरकार आहे, यामुळे जनतेच्या कामाचा विकास थांबला आहे. जनतेची कामे लवकरात लवकर झाली पाहिजे अशी मागणी विधान परिषदेचे विरोधी पक्ष नेते अंबादास दानवे यांनी केली आहे.

तुम्ही सुद्धा काय काय गमावलं हे चेक करा, मुख्यमंत्री पदावरून उपमुख्यमंत्री पदावर कसे आले हे चेक करा आणि तुम्ही तुमचे बघा आम्ही आमचं बघू असे खडेबोल सुनावत विरोधी पक्षनेते अंबादास दानवे यांनी अमृता फडणवीस यांच्या ट्विटला उत्तर दिलंय.

अब्दुल सत्तार ही विकृती आहे, ते कुठेही जातील तिथे असेच वागतील, असा टोला दानवे यांनी सत्तार यांच्या पीए च्या झालेल्या वादावर लागवलाय.

संपादक: मोईन सय्यद / प्रतिनिधी: अवधुत सावंत

उत्तर प्रदेशचे माजी मुख्यमंत्री आणि समाजवादी पक्षाचे संस्थापक मुलायम सिंह यादव यांचे आज ८२ व्या वर्षी दिल्ली येथे निधन झाले. मागील महिन्यात त्यांना रक्तदाबाच्या विकाराने ग्रासल्याने दिल्ली येथील मेदांता रुग्णालयात दाखल करण्यात आले होते. तेथेच त्यांनी आज सकाळी अखेरचा श्वास घेतला.

मुलायम यांचा जन्म २९ नोव्हेंबर १९३९ साली उत्तर प्रदेशमधील इटावा येथे झाला होता. मुलायम सिंह यादव हे अगदी तरुण वयात समाजवादी नेते डॉ. राममनोहर लोहिया यांनी केलेल्या आंदोलनात सहभागी झाले. प्रदेशामध्ये नेताजी या नावाने परिचित असलेल्या मुलायम सिंह यांनी १९९२ साली समाजवादी पक्षाची स्थापना केली. आठवेळा उत्तर प्रदेश विधानसभेवर निवडून गेले होते. १९८९, १९९३ आणि २००३ असे तिन वेळा त्यांनी उत्तर प्रदेशचे मुख्यमंत्रीपद भूषवले आहे.

उत्तर प्रदेशच्या राजकारणावर आपली छाप पाडणाऱ्या मुलायम सिंह यादव यांनी केंद्रामध्येही संरक्षण मंत्रीपदासारखी महत्त्वाची भूमिका पार पाडली. एच.डी. देवेगौडा आणि त्यानंतर इंद्रकुमार गुजराल पंतप्रधान असताना १ जून १९९६ ते १९ मार्च १९९८ दरम्यान मुलायम सिंह यादव हे संरक्षण मंत्री होते. त्यांच्या निधनामुळे देशातील समाजवादी विचारांनी राजकारणाची मांडणी करणाऱ्या एका मोठ्या चळवळीचे मोठे नुकसान झाल्याचे मानले जात आहे.

त्यांच्या पश्चात त्यांचे पुत्र अखिलेश यादव हे समाजवादी पक्षाची धुरा सांभाळत आहेत. अखिलेश यांनी २०१२ मध्ये देशातील सर्वांत कमी वयाचे मुख्यमंत्री म्हणून वयांच्या ३८ व्या वर्षी उत्तर प्रदेशचे मुख्यमंत्री म्हणून शपथ घेतली होती.

संपादक: मोईन सय्यद / प्रतिनिधी: अवधुत सावंत

केंद्रीय निवडणूक आयोगाने उध्दव ठाकरे यांना तात्पुरते मशाल हे चिन्हं दिले असून शिंदे गटाला ‘बाळासाहेबांची शिवसेना’ असे पक्षाचे नाव दिले आहे तर निवडणूक चिन्हं कोणाचे ते उद्यापर्यंत म्हणणे मांडा असे सांगितले.

शिवसेनेतील अंतर्गत भांडणामुळे दोन दिवसांपूर्वी धनुष्यबाण चिन्हं आयोगाने गोठवले तर शिवसेना हे नाव वापरण्यास ही बंदी घातली होती.आज दुपारी बारा पर्यंत नवीन नावे आणि चिन्हं सुचविण्यासाठी सांगितले होते.

त्यानुसार ठाकरे आणि शिंदे गटाने आपली नावे आणि चिन्हे सुचवली होती, त्यानुसार शिवसेना (उध्दव बाळासाहेब ठाकरे) हे नाव ठाकरे गटाला देण्याचे मान्य करीत मशाल हे चिन्हं तात्पुरत्या स्वरूपात देण्याचा आदेश आयोगाने संध्याकाळी उशिरा जाहीर केला आहे.

शिंदे गटाने सुचवलेले एकही चिन्हं आयोगाने मान्य केले नसून आणखी चिन्हे सुचविण्यासाठी सांगितले आहे, मात्र पक्षाचे नाव म्हणून बाळासाहेबांची शिवसेना असे देण्यास मान्यता दिली आहे.

त्रिशूळ आणि गदा ही चिन्हं आयोगाच्या यादीत नाहीत , तसेच उगवता सूर्य हे तामिळनाडू च्या द्रमुक पक्षाचे चिन्हं आहे त्यामुळे ही सर्व चिन्हं आयोगाने नाकारली आणि मशाल हे चिन्हं पुढील आदेशपर्यंत वापरण्यास ठाकरे गटाला परवानगी दिली आहे मात्र शिंदे गटाने आणखी चिन्हे सुचावावित असे केंद्रीय निवडणूक आयोगाने आपल्या आदेशात म्हटले आहे.