लोकहित न्युज

संपादक: मोईन सय्यद / प्रतिनिधी: अवधुत सावंत

गेल्या दोन महिन्याचा एकनाथ शिंदे – देवेंद्र फडणवीस सरकार स्थापन होऊन कालावधी उलटल्यानंतर प्रथमच राज्याचे उद्योग मंत्री उदय सामंत हे डोंबिवलीत बुधवारी ‘इंजिनिअर्स डे’ दिवशी राज्यस्तरीय उद्योजक परिषदेसाठी येणार आहेत. भारताचे सुपुत्र आणि थोर इंजिनिअर भारतरत्न मोक्षगुंडम विश्वेश्वरय्या यांची जयंती म्हणून हा दिवस संपूर्ण भारतामध्ये “इंजिनिअर्स डे” म्हणून साजरा केला जातो. याच पार्श्वभूमीवर ‘सॅटर्डे क्लब ग्लोबल ट्रस्ट’ कल्याण चॅपटर’ यांच्या वतीने दिनांक १४ सप्टेंबर २०२२, बुधवार राजी दुपारी तीन वाजता सावित्रीबाई फुले नाट्यगृह डोंबिवली येथे “इंजिनिअर्स डे” च्या पूर्व संध्येला राज्यस्तरीय उद्योजक परिषद भरवली जाणार आहे.

‘एकमेका साहाय्य करू ! अवघे होऊ श्रीमंत’ हे या ट्रस्ट चे घोषवाक्य असून “प्रत्येक उद्योजक हा त्याच्या व तिच्या व्यवसायातील एक इंजिनिअर असून प्रत्येक इंजिनिअर ने व्यावसायिक बनले पाहिजे” अशी या परिषदेची थीम असून कल्याण-डोंबिवली तसेच आसनगाव – शहापूर – अंबरनाथ – बदलापूर या परिसरातील सुमारे १००० विविध उद्योजक, फॅक्टरी ओनर्स विविध असोसिएशन या परिषदेमध्ये सहभागी होणार असून उद्योजकांना भेडसावणाऱ्या विविध समस्यांवर इथे चर्चा होऊन उद्योजकांच्या मागण्या परिषदेचे उदघाटक महाराष्ट्र राज्याचे उद्योगमंत्री नामदार उदय सामंत यांच्याकडे देणार आहेत.

यासंदर्भात ट्रस्टचे पदाधिकारी राकेश चौधरी, संतोष पाटील, विनीत बनसोडे, सुमित पाटील, नितीन बोरसे यांनी डोंबिवली जिमखाना येथे घेतलेल्या पत्रकार परिषदेत माहिती देताना नोकरी मागणारे नाही, तर नोकरी देणारे उद्योजक बना हा उद्देश समोर ठेवून मराठी उद्योजकांना मार्गदर्शन केले जात असल्याची माहिती यावेळी देण्यात आली. राज्यस्तरीय उद्योजक परिषदेचे उद्घाटन उद्योग मंत्री उदय सामंत यांच्या हस्ते करण्यात येणार आहे. परिषदेला उद्योग समूहाचे अध्यक्ष व व्यवस्थापकीय संचालक हणमंतराव गायकवाड, एमआयडीसी चे सीईओ डॉ. पी.अनबलगन (भाप्रसे), एमएसएमई महाराष्ट्र राज्याचे संचालक पार्लेवार, महाराष्ट्र राज्य इनोवेटिव्ह सोसायटीचे सीईओ डॉ. नामदेवराव भोसले यांचे मार्गदर्शन लाभणार आहे. “इंजिनीयर डे” अनुषंगाने एका उद्योजकीय प्रदर्शनाचही आयोजनही करण्यात आलेले आहे असे या पत्रकार परिषदेत उपस्थित पत्रकारांना ‘सॅटर्डे क्लब ग्लोबल ट्रस्ट च्या पदाधिकाऱ्यांकडून सांगण्यात आले .

संपादक: मोईन सय्यद / प्रतिनिधी: अवधुत सावंत

डोंबिवलीत काल अनंत चतुर्दशीच्या दिवशी शहरातील ६६ सार्वजनिक मंडळांचे आणि ३ हजार ८८५ घरगुती अशा एकूण ३ हजार ९५१ गणपती बाप्पांचे विसर्जन “गणपती बाप्पा मोरया, पुढच्या वर्षी लवकर या” च्या गजरात मोठ्या दिमाखात करण्यात आले.

शहरातील खाडी किनारी भोपर, कोपर, जुनी डोंबिवली, मोठागाव, देवीचापाडा, कुंभारखानपाडा तसेच काही कृत्रिम तलावाच्या माध्यमातून गणपती विसर्जन करण्यात आले. संध्याकाळी पावसाने गणेशभक्तांच्या आनंदावर विरजण जरी घातले असले तरीही विसर्जन सोहळा कोणत्याही व्यत्ययाशिवाय शांततेत आणि उत्साहात पार पडला. दरम्यान मोठागाव येथे माजी स्थायी समिती सभापती दीपेश म्हात्रे, माजी नगरसेवक राजेश मोरे, प्रकाश भोईर, यांच्यासह राजकीय व सामाजिक क्षेत्रातील नेते मंडळी उपस्थित होते. तर कोपर येथे माजी स्थायी समिती सभापती रमेश म्हात्रे, माजी नगरसेवक संजय पावशे, तर जुनी येथे जुनी डोंबिवली ग्रामस्थ मंडळ पदाधिकारी, भाजपाचे कृष्णा पाटील आदींनी यावेळी आपली उपस्थिती दर्शावत विशेष सहकार्य केले.

विसर्जनाच्या वेळी वाहतूककोंडी होवून वाहतुकीला अडथळा होऊ नये व विसर्जन प्रक्रिया सुरळीत पार पडावी या दृष्टीकोनातून महापालिका प्रशासन, वाहतूक यंत्रणा आणि शहर पोलीस यंत्रणा तत्परतेने सज्ज होती. शहरातील गणेशघाट विसर्जनासाठी सुसज्ज असले तरी देखील ऑन कॉल विसर्जन, कृत्रिम तलाव आणि विसर्जन आपल्या दारी आदि उपक्रमांना यावेळी चांगलाच प्रतिसाद लाभला होता.

डोंबिवलीत जुनी डोंबिवली, कुंभारखाणपाडा, मोठा गाव ठाकुर्ली यासह अन्य गणेशघाट विसर्जनस्थळांसह शहर आणि ग्रामीण भागातील तलाव अशा एकूण २३ ठिकाणी पालिका प्रशासन आणि स्वयंसेवकांची व्यवस्था करण्यात आली होती. कुंभारखाणपाडा, मोठा गाव ठाकुर्ली, जुनी डोंबिवली गणेशघाट अशा मोठ्या विसर्जन ठिकाणी इंजिन रबर बोट व्यवस्था होती. विसर्जन स्थळांच्या ठिकाणी जनरेटर, हॅलोजन्स टॉवर आणि सुरक्षेसाठी सीसीटिव्ही कॅमेरे देखील लावले गेले होते.

विसर्जन स्थळी गर्दीवर नियंत्रण ठेवण्यासाठी ड्रोनचा वापर करण्यात आला होता. विसर्जन निर्विघ्नपणे पार पडावे म्हणून वाहतूक आणि पोलिस यंत्रणा सुसज्ज होती. पोलीस अधिकारी, होमगार्ड, एसआरपीच्या तुकडया विसर्जना दरम्यान ठिकठिकाणी तैनात केल्या गेल्या होत्या. यावेळी अवजड वाहनांना विसर्जन परिसरात बंदी घालण्यात आली होती.

डोंबिवली शहरात काही ठीकाणी वाहतूकीत बदल करण्यात आला होता. दरम्यान यावेळी वाहनचालक व गणेशभक्तांनी नियमांचे पालन करावे असे आवाहन पोलीस
सातत्याने करीत होते. डोंबिवली पश्चिम मधील मोठागाव येथील गणेश घाटावर विसर्जन दरम्यान माजी नगरसेवक दीपेश म्हात्रे फाउंडेशन आणि स्वामी नारायण गृहनिर्माण सोसायटीच्या माध्यमातून विसर्जन मिरवणुकीत थकलेल्या गणेशभक्तांना मोफत दहा हजार वडा-पाव व पाण्याच्या बाटल्यांचे वाटप करण्यात आले.

‘निर्मल युथ फाउंडेशन’ तर्फे निर्माल्य पुनर्वापर प्रकल्प राबवण्याकरिता फाउंडेशन चे युवा स्वयंसेवक सर्व गणेश भक्तांना हार व फुले त्यांच्याकडे जमा करण्यासाठी सतत आवाहन करीत होते.

संपादक: मोईन सय्यद / प्रतिनिधी: अवधुत सावंत

अनेक वर्षांपासून राज्यात गाजत असलेल्या मराठा आरक्षणाचा मुद्दा अद्याप प्रलंबित असून यावर सत्ता परिवर्तन होऊन सुद्धा या मुद्द्यावर तोडगा निघण्याचा कुठलाही मार्ग सध्यातरी दिसत नाही आहे. सध्या हे प्रकरण न्यायप्रविष्ट आहे परंतु महाविकास आघाडी सरकारमध्ये याबाबत कुठलेही ठोस पाऊले उचलण्यात आले नाही, त्यामुळे हल्लीच्या सरकारकडून क्रांती मोर्चाला आशा लागून आहे. जोपर्यंत मराठा आरक्षणाचा मुद्दा मार्गी लागत नाही तोपर्यंत नोकरभरती थांबवा, असे साकडेच सातारा जिल्ह्यातील कऱ्हाड तालुका क्रांती मोर्चाने मुख्यमंत्री एकनाथ शिंदे यांना घातले आहे. यावर महिनाभऱ्यात काहीतरी तोडगा निघावा अशी मागणी क्रांती मोर्चाने केली आहे, अन्यथा नाईलाजाने १० ऑक्टोबर पासून आम्ही बेमुदत आमरण उपोषण करणार, अशा आशयाचे निवेदन तहसीलदार यांच्या मार्फत मुख्यमंत्र्यांना नुकतेच देण्यात आले आहे.

मराठा समाजाचे आरक्षण रखडल्याने समाजातील अनेक गुणवंत विद्यार्थ्यांचे शैक्षणिक व आर्थिक नुकसान होत असल्याची बाब निवेदनात नमूद करण्यात आली. यामुळे अनेक गुणवंत विद्यार्थी नोकरीपासून वंचित होत आहे, ओबीसी समाजाच्या आरक्षणाला कुठल्याही प्रकारे धक्का न लावता मराठा समाजाला न्याय मिळवून द्यावा अशी मागणी यावेळी करण्यात आली आहे. जोपर्यंत मराठा आरक्षणाचा मुद्दा निकाली निघत नाही तोपर्यंत नोकरभरती थांबवा, अन्यथा आम्ही बेमुदत आमरण उपोषणाचा पर्याय निवडू, असा विनंतीवजा सूचक इशारा मराठी क्रांती मोर्चाने दिला आहे.