मिरा-भाईंदर, प्रतिनिधी: ‘फ़ॉर फ़्यूचर इंडिया’ ( www.forfutureindia.org ) ही पर्यावरण प्रेमी युवांची संस्था असून ही संस्था प्रत्येक आठवड्याला समुद्र किनारा स्वच्छ करण्याची म्हणजेच आपल्या निसर्ग सौंदर्यात भर घालण्याची मोहीम अतिशय उत्साहाने राबवत आहे. प्रत्येक आठवड्याला शनिवारी व रविवारी कोणत्या न कोणत्या समुद्र किनाऱ्यावर ( Beach Cleanups ) किंवा कांदळवन भागात साफ-सफाई करण्याचे उपक्रम राबवत आहे. आता पर्यंत या संस्थेने उत्तन, मनोरी, गोराई, वेलंकनी, जुहू, दानापाणी, खारदांडा, अर्नाळा समुद्रकिनाऱ्यावर तर भाईंदर पूर्व खाडी व भाईंदर पश्चिम खाडी येथे हा उपक्रम राबवला आहे.
रविवार दिनांक २१ ऑगस्ट २०२२ रोजी ‘फ़ॉर फ़्यूचर इंडिया’ संस्थेने आपले १५० वे स्वच्छता अभियान उत्तन समुद्रकिनारी राबविले. यावेळी या स्वच्छता अभियानात मीरा भाईंदर येथील रॉयल कॉलेज, अभिनव कॉलेज, शंकर नारायण कॉलेज व मिरा भाईंदर महानगपालिका स्वच्छता विभाग तर प्रामुख्याने उत्तन येथील आमचा घर संस्थेतील लहान मुलांनी हातभार लावला. १६० हुन अधिक स्वयंसेवक या अभियानात सहभागी झाले होते तर सर्वांनी मिळून ३० टन हुन अधिक प्लॅस्टिक व इतर कचरा उत्तन समुद्र किनाऱ्यावरून काढला.
‘फ़ॉर फ़्यूचर इंडिया’ संस्थेने गेल्या जानेवारी २०२० पासून आता पर्यंतच्या अडीच वर्षातील प्रवासात हजरो स्वयंसेवकांच्या मार्फत ७०० टनहुन अधिक प्लॅस्टिक व इतर कचरा काढत लाखो लोकांपर्यंत प्रबोधन करण्याचे कार्य केले आहे.
“मिरा भाईंदर येथील वेलंकन्नी व उत्तन समुद्र किनारी पर्यटन व मासेमारी व्यापाऱ्यांकडून तयार होणार कचरा हा दिवसेंदिवस वाढत चाला आहे यात भर म्हणजे पावसाळी काळातील भरती-आहोटी मुळे मोठ्या प्रमाणत किनारी येणारा कचरा यामुळे प्रत्येक किनारी फक्त कचऱ्याचे साम्राज्य तयार झाले आहे. ‘हा कचरा आपण भरत असलेल्या टॅक्सच्या पैशातून पालिकेला काढायला पाहिजे किंवा स्थानिक नेतेमंडळींनी यात लक्ष देऊन स्वच्छता केली पाहिजे’ असे दुर्लक्षित नागरिकांचा विचार बनण्यापेक्षा स्वतः पुढे येऊन आपले कर्तव्य समजत युवांनी हि मोहीम सुरु केली आहे.” – हर्षद ढगे, संस्थापक/अध्यक्ष – फ़ॉर फ़्यूचर इंडिया व मीरा भाईंदर शहर – पर्यावरण दूत ( www.harshaddhage.com )
