लोकहित न्युज

संपादक: मोईन सय्यद / प्रतिनिधी: अवधुत सावंत

शिवसेनेचे माजी खासदार अनंत गितेंनी आज मोठं वक्तव्य केलं. छगन भुजबळ आणि नारायण राणे यांनी जे बंड केलं ते बंड स्वबळावर केलं होतं. एकनाथ शिंदे यांचं बंड भाजप पुरस्कृत आणि त्यांच्या पाठिंब्यामुळेच आहे अशी घणाघाती टीका शिवसेनेचे ज्येष्ठ नेते आणि माजी खासदार अनंत गीते यांनी रत्नागिरीत केली आहे. एवढंच नाही तर शिवसेनेने यापुढील सर्व निवडणुका स्वबळावर लढवाव्यात असंही त्यांनी म्हटलं आहे.

भाजप रचित हे बंड :
छगन भुजबळ आणि नारायण राणे यांनी स्वबळावर बंड केलं. राणेंच्या बंडाला काँग्रेसने सहकार जरुर केला, पण त्या बंडाचे पुरस्कर्ते काँग्रेस नव्हती. त्या बंडाचं कारस्थान काँग्रेसने रचलेलं नव्हतं. मात्र सध्याचं बंड हे भाजप पुरस्कृत, भाजप रचित हे बंड असल्याची टीका गीते यांनी केली.

आम्हाला राजकीय जन्म देणारी शिवसेना माता :
पुढे गिते म्हणाले ”घराघरांत कलह आहेत, वाद आहेत आणि आपली आई संकटात असेल तर आपण कलह करत बसणार नाही, तर आईला वाचवणार. आज शिवसेना संकटात आहे, ही आपली आई संकटात आहे. आपल्याला आईला वाचवायचं आहे. आम्हाला राजकीय जन्म देणारी शिवसेना माता आहे, आणि आज ही आई संकटात आहे, तिला आपल्याला वाचवायचं आहे.”

उद्धवजींच्या अश्रूंचा आपण महापूर केला पाहिजे :
उद्धवजींच्या अश्रूंचा आपण महापूर केला पाहिजे, आणि यामध्ये या गद्दारांना गाडून टाका” असेही गिते म्हणाले आहेत. एकनाथ शिदेंसह ४० आमदारांनी शिवसेनेविरोधात बंडखोरी केल्यानतंर राज्यातील राजकीय वातावरण तापलेले आहे. एकनाथ शिंदे गट आणि शिवसेना यांच्यात मागच्या काही काळापासून संघर्ष चालू आहे. आदित्य ठाकरे सध्या महाराष्ट्र दौऱ्यावर आहेत. शिव संवाद यात्रेच्या माध्यमातून ते शिवसैनिकांना संबोधित करत आहेत.

संपादक: मोईन सय्यद / प्रतिनिधी: अवधुत सावंत

राज्यात सध्या उद्धव ठाकरे आणि एकनाथ शिंदे यांच्यातील शिवसेनेवरून सुरू असलेल्या वादाच्या लढाईने आता वेगळे वळण घेतले आहे. हा वाद आता निवडणूक आयोगाच्या दारापर्यंत पोहोचला आहे. आयोगाने उद्धव ठाकरे आणि शिंदे गटाला बहुमताचे कागदोपत्री पुरावे सादर करण्याचे निर्देश दिले आहेत. त्यासाठी ८ ऑगस्टची मुदत देण्यात आल्याची माहिती सूत्रांनी दिली आहे. दोन्ही बाजूंचा युक्तिवाद ऐकून निवडणूक आयोग सुनावणी घेणार आहे. शिवसेनेचे निवडणूक चिन्ह ‘धनुष्यबाण’ कोणाकडे राहणार याचा निर्णयही ८ ऑगस्टला होणार आहे.

मुख्यमंत्री एकनाथ शिंदे यांच्यासोबत शिवसेनेच्या ४० हून अधिक आमदारांनी बंडखोरी केल्यानंतर पक्षात मोठी फूट पडली आहे. शिंदे गटाने भाजपसोबत युती करून सरकार स्थापन केले. एकनाथ शिंदे यांनी मुख्यमंत्रीपदाची तर देवेंद्र फडणवीस यांनी उपमुख्यमंत्रीपदाची शपथ घेतली. त्यानंतर शिंदे गटावर कारवाई करण्यासाठी शिवसेनेने सर्वोच्च न्यायालयात याचिका दाखल केली आहे. दुसरीकडे शिंदे गटाने खरी शिवसेना आमचीच असल्याचा दावा केला आहे. तसेच शिवसेनेचे ‘धनुष्यबाण’ हे चिन्ह असल्याचा दावाही शिंदे गटाने केला आहे.

एकनाथ शिंदे गटाने निवडणूक आयोगाला पत्र पाठवून आपल्याच गटाला शिवसेना म्हणून मान्यता द्यावी, अशी मागणी केली होती. यापूर्वी सर्वोच्च न्यायालयात ही लढाई सुरू होती, आता हा वाद निवडणूक आयोगापर्यंत पोहोचला आहे. दोन्ही बाजू ऐकून घेतल्यानंतर निवडणूक आयोग आपला निर्णय जाहीर करेल. त्यासाठी दोन्ही बाजूंच्या गटांना ८ ऑगस्टपर्यंत कागदोपत्री पुरावे सादर करण्याचे निर्देश दिले आहेत.

संपादक: मोईन सय्यद / प्रतिनिधी: अवधुत सावंत

रावेर तालुक्यातील सुकी नदीपात्रात अडकलेल्या नऊ पर्यटकांना चार तासांच्या अथक प्रयत्नांनंतर सुखरूप बाहेर काढण्यात जळगाव जिल्हा प्रशासनास यश आले आहे.
जळगाव जिल्ह्यातील रावेर तालुक्यातील सुखी (गारबर्डी) धरणाचा वेस्ट वेअर ओसंडून वाहत असून या जलप्रवाहाच्या विळख्यात ९ पर्यटक अडकल्याची माहिती सायंकाळी ६.३० वाजता स्थानिकांनी प्रशासनाला दिली. हे नऊ पर्यटक नदीच्या मधोमध उभे असून पाण्याचा वेढा त्यांच्या दोन्ही बाजूने पडला आहे. तसेच पाण्याचा प्रवाह वाढतच असल्याने हे सर्व जण वाहून जाण्याची भीती व्यक्त केली जात होती. याबाबतची माहिती पाटबंधारे विभागाचे कार्यकारी अभियंता श्री. बेहरे, सावदा येथील उपविभागीय अभियंता यांनी जिल्हा आपत्ती व्यवस्थापनाला देऊन बचाव कार्य तातडीने उपलब्ध करून देण्याची विनंती केली.

याबाबतची माहिती जिल्हाधिकारी अभिजीत राऊत यांना मिळताच त्यांनी फैजपूर चे प्रांत अधिकारी कैलास कडलग आणि रावेरच्या तहसिलदार उषाराणी देवगुणे यांना बचाव साहित्यासह घटनास्थळी पोहोचण्याचे निर्देश दिले. त्याचबरोबर सतत सुरू असलेला पाऊस तसेच नदीपात्रात वाढत जाणारे पाणी ही बाब लक्षात घेऊन निवासी उपजिल्हाधिकारी राहुल पाटील यांनी राज्य आपत्ती प्रतिसाद दलाची मदत मिळण्यासाठी मंत्रालयातील आपत्ती निवारण कक्षास संपर्क साधण्यात आला. त्यानुसार धुळे येथील राज्य आपत्ती प्रतिसाद दलाची तुकडीही घटनास्थळाकडे रवाना झाली.

प्रांत अधिकारी कडलग आणि तहसिलदार श्रीमती देवगुणे यांनी स्थानिक नागरिक तसेच पोहणारे १. इम्रान शहा रतन शहा रा.पाल
२. संतोष दरबार राठोड रा.पाल
३. रतन भंगी पावरा रा.गारखेडा
४. तारासिंग रेवलसिंग पावरा रा.गारबर्डी
५. सिद्धार्थ गुलजार भिल
यांच्या मदतीने मुक्ताईनगर येथील या नऊ पर्यटकांना सुखरूप बाहेर काढण्यात यश मिळविले. यासाठी त्यांना स्थानिक आमदार शिरीष चौधरी, रावेर तहसील कार्यालय, सावदा पोलीस स्टेशन, प्रांत कार्यालय फैजपूर, वन्यजीव अधिकारी व कर्मचारी आदीचे सहकार्य लाभले.

सुकी नदी पात्रात अडकलेल्या व सुटका झालेल्या व्यक्ती
१. अतुल प्रकाश कोळी (२० वर्षे)
२. विष्णू दिलीप कोलते (१७ वर्षे)
३. आकाश रमेश धांडे (२५ वर्षे)
४. जितेंद्र शत्रुघ्न कूंडक (३० वर्षे
५. मुकेश श्रीराम धांडे (१९ वर्षे
६. मनोज रमेश सोनावणे (२८वर्षे)
७. लखन प्रकाश सोनावणे (२५ वर्षे)
८. पियूष मिलिंद भालेराव (२२ वर्षे)
९. गणेशसिंग पोपट मोरे (२८ वर्षे)
सर्व रा. मुक्ताईनगर या सर्वांना सुखरूप बाहेर काढण्यात आल्याची माहिती तहसिलदार उषाराणी देवगुणे यांनी प्रसिद्धी माध्यमांना दिली आहे.

जिल्ह्यात पावसाची संततधार सुरू असून नदीपात्रात पाण्याची अचानक वाढ होत असल्याने नागरिकांनी नदीपात्रात तसेच धरण परिसरात जावू नये असा इशारा देत परिसरातील सर्व नागरिकांना जिल्हाधिकारी अभिजीत राऊत यांनी आवाहन केले आहे.