लोकहित न्युज

संपादक: मोईन सय्यद / प्रतिनिधी: अवधुत सावंत

राज्याचे उपमुख्यमंत्री तथा वित्तमंत्री अजित पवार यांनी विधानसभेतील अर्थसंकल्पामध्ये घोषणा केल्याप्रमाणे संकुचित नैसर्गिक वायू म्हणजेच सीएनजी (CNG) इंधनावरील मुल्यवर्धित कराचा (VAT) दर १३.५ टक्क्यांवरुन ३ टक्के इतका कमी केल्याची अधिसूचना काल (शुक्रवारी) केली. याबाबत अधिवेशनाच्या अखेरच्या दिवशी अधिसुचना जाहीर केली गेली. यामुळे महाराष्ट्रात १ एप्रिलपासून सीएनजी स्वस्त होणार असल्याने सीएनजीवरील वाहन चालवणाऱ्या चालकांसाठी ही एक खूशखबर आहे.

अधिसूचनेप्रमाणे इंधनावरील मुल्यवर्धीत कराचा (VAT) १३.५ टक्क्यांवरुन ३ टक्के करण्यात आला आहे. १ एप्रिलपासून सीएनजीचे सुधारित दर लागू होणार आहेत. अजित पवार यांच्या नेतृत्वाखालील वित्त विभागाने काल जारी केलेल्या अधिसूचनेप्रमाणे १ एप्रिलपासून महाराष्ट्रात सीएनजी इंधन स्वस्त होणार आहे. त्यामुळे सीएनजीवरील वाहन चालवणाऱ्या वाहनचालकांना एक मोठा दिलासा मिळाला आहे.

दरम्यान, पेट्रोल आणि डिझेलवर चालणाऱ्या वाहनांमुळे मोठ्या प्रमाणात प्रदूषण होते. सीएनजीचे दर कमी झाल्याने आता अशा वाहनांमुळे निर्माण होणाऱ्या वायू प्रदूषणाला देखील अटकाव बसू शकतो. प्रदूषण नियंत्रणासाठीही हा निर्णय महत्वाचा आहे.

संपादक: मोईन सय्यद / प्रतिनिधी: अवधुत सावंत

  मुंबईसह जोगेश्‍वरी विधानसभा क्षेत्रातील विविध ठिकाणांवर उभारण्यात आलेल्या व येणार्‍या उड्डाणपुलाखालील वाढती अतिक्रमणे दूर करुन त्या जागा सुशोभित करण्यात येणार असून पश्‍चिम द्रूतगती महामार्ग (जोगेश्‍वरी विक्रोळी लिंक रोड जंक्शन), ऑबेरॉय मॉल व आरे जंक्शन येथील उड्डाणुपलाखालील मोकळी जागा सुशोभिकरणाकरीता ऑबेरॉय रियल्टी यांना देण्यात आल्याची माहिती नगरविकास मंत्री एकनाथ शिंदे यांनी जोगेश्‍वरी विधानसभा क्षेत्राचे आमदार रविंद्र वायकर यांनी तारांकीत प्रश्‍नांद्वारे विचारलेल्या प्रश्‍नाला उत्तर देेताना दिली.

वाहतुकीची कोंडी सोडविण्यासाठी मुंबईच्या विविध भागांमध्ये उड्डाणपुल उभारण्यात आले आहेत. एवढेच नव्हे तर एमएमआरडीएच्या माध्यमातूनही अनेक ठिकाणी मेट्रोची कामेही सुरू आहे. जोगेश्‍वरी विधानसभा क्षेत्रातही जेव्हीएलआर व पश्‍चिम द्रुतगती महामार्गावर उड्डाणपुल उभारण्यात आले आहेत. यात पश्‍चिम द्रुतगती महामार्ग, जोगेश्‍वरी वाहतूक चौकी, सिप्झ गेट नंबर ३ समोर, जेव्हीएलआर, आरे जंक्शन, पश्‍चिम द्रुतगती महामार्ग येथील ऑबेरॉय मॉल, येथील उड्डाणपुलाखालील जागांमध्ये मोठ्याप्रमाणात अनधिकृत बांधकामे करण्यात येत असल्याचे वायकर यांनी तारांकीत प्रश्‍नाच्या माध्यमातून सभागृहाच्या निदर्शनास आणले. या उड्डाणपुलाखाली बेकायदेशीरीत्या अनेक नादुरुस्त वाहने अनधिकृतरित्या उभी असतात. याच उड्डाणपुलाखाली अनधिकृत बांधाकम करुन वास्तव्यास असलेले लोक त्यांचे प्रात:विधी याच परिसरात करीत असल्याने परिसरात घाणीचे साम्राज्य निर्माण होत असून जनतेच्या आरोग्याचा प्रश्‍नही निर्माण झाला आहे.

त्यामुळे ज्या ज्या उड्डाणपुलाखाली अनधिकृत बांधकामे तातडीने निष्कासित करुन तसेच या जागेवर अनधिकृतरित्या उभी करण्यात आलेली जुनी व नादुरुस्त वाहने हटवून या उड्डाणपुलाखालील जागेचे सुशोभिकरण करुन आकर्षक रचनेची उद्याने बांधून ती जनतेसाठी खुली करावीत, अशी मागणी आमदार वायकर यांनी तारांकीत प्रश्‍नाच्या माध्यमातून सभागृहात केली. या प्रश्‍नाला उत्तर देताना नगरविकास मंत्री एकनाथ शिंदे यांनी,‘सिप्झ गेट नंबर ३’ येथील काही मोकळ्या जागेत काहीवेळा बेघर लोक वास्तव्य करीत असल्याचे मान्य केले. जेव्हीएलआर, आरे व ऑबेरॉय मॉल जवळील उड्डाणपुलाखाली मेट्रोलाईन-६ व व मेट्रो लाईन-७ चे कार्यालय असून ही दोन्ही कामे पूर्ण झाल्यावर हे कार्यालय तेथेच राहणार असून पश्‍चिम द्रुतगती महामार्ग (जोगेश्‍वरी विक्रोळी लिंक रोड जंक्शन), ऑबेरॉय मॉल व आरे जंक्शन येथील उड्डाणपुलाखालील मोकळी जागा सुशोभिकरणाकरीता मे.ऑबेरॉय रियल्टी यांना वाटप करण्यात आल्याची माहिती, नगरविकास मंत्री एकनाथ शिंदे यांनी आमदार रविंद्र वायकर यांच्या तारांकीत प्रश्‍नाला उत्तर देताना दिली.