लोकहित न्युज

संपादक: मोईन सय्यद / प्रतिनिधी: अवधुत सावंत

डोंबिवली सारख्या सुशिक्षित आणि सुसंस्कृत शहरात अल्पवयीन मुलीचा विनयभंग करणारा पोलीस शिपाई हाच कायद्याचा रक्षक असून भक्षक बनल्याची घटना गुरुवारी दि.१९ ऑगस्ट ला नांदीवली परिसरात घडली आहे. एका पोलीस शिपायाने एका अल्पवयीन मुलीचा विनयभंग केला आहे. या प्रकरणी रामनगर पोलीस ठाण्यात गुन्हा दाखल झाला असून आरोपी शिपायाची रवानगी कारागृहात झाली आहे. तसेच आरोपी पोलीस शिपयाचे तडकाफडकी निलंबनही करण्यात आले आहे.

डोंबिवलीतील रामनगर पोलीस ठाण्यात कार्यरत असलेल्या एका पोलीस शिपायाने तो राहत असलेल्या इमारतीमधील एका अल्पवयीन मुलीशी लगट करून तिचा विनयभंग केल्याची नुकतीच घटना समोर आली आहे. याप्रकरणी रामनगर पोलीस ठाण्यात ‘विनयभंग’ आणि ‘पोक्सो’ कायद्याअंतर्गत गुन्हा दाखल करून पोलिसांनी आरोपीस अटक केली आहे. त्याला न्यायालयात हजर केले असता न्यायालयाने त्याची रवानगी कारागृहात केली आहे. सतीश कार्ले (वय ३४ वर्षे), असे आरोपी पोलीस कर्मचाऱ्याचे नाव आहे.

इमारतीच्या जिन्यात पीडितेचा विनयभंग

रामनगर पोलीस ठाण्यात चार वर्षांपासून आरोपी पोलीस शिपाई सतीश कार्ले हा कार्यरत होता. तो कुटूंबासह डोंबिवली जवळील नांदीवली परिसरात एका सोसायटी राहण्यास आहे. गुरुवारी दि. २० ऑगस्टला दुपारच्या सुमारास पीडित मुलगी इमरतीच्या जिन्यातून जात असताना आरोपी पोलीस शिपायाने तिच्याशी लगट करत विनयभंग केला. या घटने नंतर त्याच रात्री पीडित मुलीने त्याच्या विरोधात रामनगर पोलीस ठाण्यात धाव घेऊन घडलेल्या प्रसंगाचे कथन केले. यावरुन पोलिसांनी पोलीस शिपायावर ३५४, ३५४ (अ), पोक्सोचे कलम १० व १२ नुसार मध्यरात्री दोनच्या सुमारास गुन्हा दाखल केला आहे.

आरोपी शिपायाचे तडकाफडकी निलंबन

शुक्रवारी दि. २० ऑगस्ट रोजी सकाळी अटक केल्यानंतर त्याला कल्याण न्यायालयात हजर करण्यात आले असता न्यायालयाने एक दिवसाच्या पोलीस कोठडीत त्याची रवानगी केली होती. पोलीस कोठडी संपल्याने त्याला पुन्हा शनिवारी दि. २१ ऑगस्ट रोजी न्यायालयात हजर करण्यात आले. न्यायालयाने त्याची रवानगी आधारवाडी कारागृहात केली आहे. तर दुसरीकडे पोलीस उपायुक्त विवेक पानसरे यांनी शिपाई सतीश कार्ले याला तडकाफडकी निलंबित केले आहे असे रामनगर पोलिसांकडून प्रसिद्धी माध्यमांना सांगण्यात आले.

संपादक: मोईन सय्यद / प्रतिनिधी: अवधुत सावंत

कल्याण जीआरपीने झटापटीत महिलेचा मोबाईल हिसकावून पळणाऱ्या आरोपीला अटक केली आहे. विशेष म्हणजे याच महिलेने नागरिकांच्या मदतीने आरोपीला पकडून कल्याण रेल्वे पोलिसांच्या ताब्यात दिले होते. मात्र महिलेचा मोबाईल अद्याप सापडलेला नाही. पोलीस या प्रकरणी अधिक तपास करत आहेत.

मुंबईत काम करणारी एक महिला काही कामानिमित्त शहाड येथे आली होती. ती शहाड रेल्वे स्थानकात थांबली होती. याच वेळी एक तरुण तिच्याजवळ आला. त्याने या महिलेच्या हातातील मोबाईल खेचण्याचा प्रयत्न केला, यावेळी महिलेने प्रतिकार केला मात्र तिला हिसका देऊन मोबाईल हिसकावून चोरट्याने पळ काढला.

या झटापटीत महिलेचे काही दागिने गायब झाले. महिलेने पाठलाग करत चोराला पकडले. याच दरम्यान एक पोलीस कर्मचारी आणि काही नागरिक त्या ठिकाणी पोहोचले आणि त्यांनी या चोरट्याला पकडले. शाहरुख गफूर शेख या चोरट्याला कल्याण रेल्वे पोलिसांनी अटक केली आहे. ही घटना १४ ऑगस्ट २०२१ रोजी घडली असून अद्याप मोबाईल आणि दागिने सापडलेले नाहीत.

दरम्यान, मूकबधीर तरुणीवर बलात्कार करुन, तिचा महागडा मोबाईल हिसकावून पसार झालेल्या आरोपीला कल्याण पोलिसांनी गुजरातहून अटक केल्याची घटना गेल्याच महिन्यात उघडकीस आली होती. मूकबधीर तरुणीवरील बलात्काराच्या घटनेमुळे कल्याणमध्ये एकच खळबळ उडाली होती. पहाटेच्या सुमारास मूकबधीर तरुणीवर बलात्कार करुन तिचा मोबाईल हिसकावून आरोपी पसार झाला होता. मात्र कल्याण स्थानकात लागलेल्या सीसीटीव्ही कॅमेरात आरोपी कैद झाला होता.

संपादक: मोईन सय्यद / प्रतिनिधी: अवधुत सावंत

सेक्सटॉर्शनच्या या टोळीमध्ये दोन आरोपी व्यवसायाने अभियंता आहेत, तर एक अल्पवयीन आरोपी देखील सामील आहे. पोलिसांनी त्यांच्याकडून मोबाईल, १२ बनावट खाती, ६ बनावट ई-मेल आयडी आणि इतर इलेक्ट्रॉनिक उपकरणे जप्त केली आहेत.

पोलिसांकडून चार आरोपींना अटक

गुन्हेगारी जगतात तुम्ही खंडणी वसुलीचे प्रकार अनेक वेळा ऐकले असतील. पण यावेळी मुंबई पोलिसांनी एक असे रॅकेट पकडले आहे, ज्याची व्याप्ती अत्यंत मोठी आहे. सामान्य माणसांपासून बॉलिवूडचे जवळपास १०० सेलिब्रिटीज यात अडकले आहेत. मुंबई पोलिसांनी सेक्सटॉर्शन प्रकरणात नागपूर, ओडिशा, गुजरात, कोलकाता येथून चार आरोपींना अटक केली आहे, वेगवेगळ्या राज्यात २५८ जणांची फसवणूक गेल्या अनेक दिवसांपासून मुंबई पोलिसांसमोर सेक्स्टॉरशनची प्रकरणे समोर येत होती. कारवाई करताना मुंबई पोलिसांच्या सायबर सेलने एका टोळीला पकडले आहे, ज्याने वेगवेगळ्या राज्यांतील २५८ जणांना त्याचा बळी बनवले आहे.

पीडितांकडून लाखो रुपये उकळले

मुंबई पोलिसांच्या सायबर सेलने ज्या टोळीचा भांडाफोड केला आहे, त्याने आतापर्यंत सुमारे २५८ जणांची फसवणूक केली आहे, त्यापैकी बॉलिवूडमध्ये ‘ए’ श्रेणीमध्ये येणारे सुमारे १०० जण आहेत. याशिवाय ‘टीव्ही इंडस्ट्री’शी निगडीत असलेले अनेक अभिनेते आणि अभिनेत्री देखील या ‘सेक्स्टॉरेशन रॅकेट’चे बळी ठरले आहेत. या व्हिडीओच्या बदल्यात हे रॅकेट या सेलिब्रिटीज आणि पीडितांकडून लाखो रुपये घेत असत. या व्हिडिओंचे क्लिप्स नंतर ट्विटर, डार्कनेट आणि टेलिग्राम यासारख्या सोशल मीडिया ऍप्लिकेशनवर इतर लोकांना मोठ्या पैशांना विकले गेले जाते.

काय आहे मोडस ऑपरेंडी

‘सेक्स्टॉरेशन’ मध्ये एखाद्या व्यक्तीशी सोशल मीडियाद्वारे (स्नॅपचॅट आणि इंस्टाग्राम) ऍप वरून पहिल्यांदा मैत्री केली जाते. मग ६ महिने किंवा त्याहून अधिक काळानंतर ती व्यक्ती त्याच्या प्रेमाच्या जाळ्यात अडकवली जाते. मग एखाद्या दिवशी व्हिडिओ कॉलवर त्या व्यक्तीला नग्न होण्यास सांगितले जाते. त्याचा नग्न व्हिडीओ रेकॉर्ड केला जातो. यानंतर ‘ब्लॅकमेलिंग’ सुरू होते. सार्वजनिक व्यासपीठावर हे नग्न व्हिडिओ अपलोड न करण्याच्या अटीवर सेलिब्रिटी किंवा त्या व्यक्तीकडून मोठी रक्कम उकळली जाते.

नेपाळच्या बँक खात्यातून व्यवहार

‘सायबर सेल’ला त्याच्या तपासात कळले की या आरोपींनी तपास यंत्रणांना टाळण्यासाठी नेपाळच्या बँक खात्यातील पैशांच्या व्यवहारांसाठी वापर केला आहे. या लोकांना भीती वाटली की जर हे प्रकरण समोर आले तर त्यांचे खाते बंद पाडले जाईल. ‘सायबर सेल’ने आता नेपाळ प्रशासनाला या प्रकरणाची माहिती दिली आहे आणि बँक खात्याशी संबंधित तपशील मागितला आहे जेणेकरून प्रकरणाचा तळ गाठता येईल.

संपादक: मोईन सय्यद / प्रतिनिधी: अवधुत सावंत

कल्याणच्या महात्मा फुले चौक पोलीस ठाणे येथे गु.रजि.नं. ८४७/२०१४ भादवि कलम ४२०,४६७,४६८,४७१,४०६,३४ प्रमाणे दि.२१/११/२०१४ रोजी गुन्हा दाखल होता. गुन्ह्यातील गेले ७ वर्षांपासून स्वतःचे अस्तित्व लपवून फरार असलेला तसेच मा.न्यायालयाने जाहीरनामा काढून त्याची लखनऊ येथील १.७५ करोड रुपयांची प्रॉपर्टी जप्त करून लिलावाच्या आदेश दिल्यानंतरही हजर न झालेला गुन्ह्यातील पाहिजे असलेला आरोपी नामे माजिदअली उर्फ गुड्डू मन्सूरअली शेख रा. ए/३, चाळ नं.१०३, हिंदुस्थान चाळ, कामराजनगर, व्ही.एन.मार्ग घाटकोपर (पूर्व) मुंबई – ७७, याचा गुन्हे शाखा, घटक-३ कल्याण कडून समांतर तपास सुरू असताना नमूद फरारी व पाहिजे असलेल्या आरोपी बाबत पोलीस अधिकारी व अंमलदार यांनी गुप्त बातमीदारा मार्फत माहिती काढून गोपनीय रित्या त्याचा मोबाईल क्रमांकाचे तांत्रिक विश्लेषणावरून तो तिरुपती अपार्टमेंट ए/१०५, सेक्टर २०, कामोठे, नवी मुंबई या परिसरात राहत असले बाबत खात्रीशीर माहिती काढून त्याचा सध्याचा फोटो प्राप्त करून सापळा रचून त्याचा शोध घेवून पाहिजे आरोपी माजिदअली उर्फ गुड्डू मन्सूरअली शेख यास काल दि.१८/०८/२०२१ रोजी ताब्यात घेवून महात्मा फुले चौक पोलीस ठाणे येथे गुन्ह्याच्या पुढील तपासकामी ताब्यात देण्यात आला आहे. प्रस्तुत गुन्ह्यातील यापूर्वी अटक आरोपी पैकी मा. न्यायालयाने एक आरोपीस ३ वर्षे कैद व दुसऱ्या आरोपीस ५ वर्षे कैद अशी शिक्षा ठोठावली आहे.

तसेच नमूद आरोपी याचे विरुद्ध १) महात्मा फुले चौक पो.स्टे. गु.रजि.नं. ८३९/२०१४
२) महात्मा फुले चौक पो.स्टे. गु.रजि.नं. ८६४/२०१४ भादवि कलम ४२० प्रमाणे २ गुन्हे दाखल आहेत.
तसेच खोडारे पोलीस ठाणे जिल्हा गोंडा उत्तरप्रदेश येथील गु.रजि.नं. १५७/२०१६ भादवि कलम ३०७,३२६,५०४,५०६,३४ या गुन्ह्यात पाहिजे असलेला आरोपी असल्याची माहिती प्राप्त झाली आहे.

प्रस्तुत गुन्ह्याच्या तपासाची कामगिरी मा.वरिष्ठांच्या मार्गदर्शनाखाली गुन्हे शाखा घटक-३, कल्याणचे पोलीस निरीक्षक श्री.विलास पाटील, सपोनि भूषण एम.दायमा, पोउनि मोहन कळमकर, सपोउनि साळुंखे, विलास मालशेटे, दत्ताराम भोसले, सचिन साळवी, राजेंद्र खिलारे, मंगेश शिर्के, सुरेश निकुळे, प्रकाश पाटील, हरिश्चंद्र बांगारा, पोशि अजितसिंग राजपूत, सचिन वानखेडे, मिथुन राठोड, गुरुनाथ जरग, गोरक्ष शेकडे, राहुल ईशी यांनी यशस्वीरित्या पार पाडली आहे.