प्रतिनिधी: अवधुत सावंत
सचिन वाझे यांना काल रात्री उशिरा एनआयए कडून अटक करण्यात आली. या प्रकरणात आतापर्यंत नेमकं काय काय घडलं ते जाणून घेऊया..
मुकेश अंबानी यांच्या एंटिलिया निवास स्थानाबाहेर स्फोटकांनी भरलेली स्कॉर्पियो जीप आढळली. नंतर या गाडीच्या मालकाचा मृतदेह मुंब्र्याच्या खाडीत आढळून आला. हे प्रकरण मग विधानसभेत विरोधकांनी उचलून धरले. यात नाव समोर आलं ते एन्काऊंटर स्पेशालिस्ट पोलीस अधिकारी सचिन वाझे यांचे. सचिन वाझे यांना काल रात्री उशिरा एनआयए कडून अटक करण्यात आली. या प्रकरणात आतापर्यंत नेमकं काय घडलं ते आता जाणून घेऊया.
स्फोटकांनी भरलेली जीप आढळल्याने खळबळ
भारतातील श्रीमंत उद्योजक आणि रिलायन्स इंडस्ट्रीजचे मालक मुकेश अंबानी यांच्या निवासस्थानाबाहेर स्फोटकांनी भरलेली स्कॉर्पियो जीप आढळल्याने खळबळ उडाली होती. मुंबईतील एंटिलिया या निवासस्थानाजवळ उभ्या असलेल्या स्कॉर्पिओ गाडीत जिलेटीन स्फोटकांचा साठा सापडला. या स्फोटकांसह एक चिट्ठीही सापडली. त्यामधून घातपाताची धमकी दिल्याची माहीती समोर आली.
देवेंद्र फडणवीसांनी विधानसभेत उपस्थित केला मुद्दा
विरोधी पक्षनेते देवेंद्र फडणवीस यांनी हा मुद्दा विधानसभेत उपस्थित केला. मुकेश अंबानी यांच्यासारखे मोठे उद्योजक सुरक्षित नाहीत. त्यांच्या घराबाहेर आढळलेली जिलेटीनने भरलेली गाडी आणि संपूर्ण घटनाक्रम संशय निर्माण करणारा आहे. त्यामुळे तपास एनआयए कडे सोपवावा अशी मागणी विधानसभेचे विरोधी पक्षनेते देवेंद्र फडणवीस यांनी केली. सोबतच या प्रकरणात पोलीस अधिकारी सचिन वाझे यांच्या भूमिकेवरही प्रश्न उपस्थित केले. फडणवीस यांनी मुकेश अंबानी यांच्या घराबाहेर पार्क केलेल्या स्फोटकांनी भरलेल्या गाडीच्या प्रकरणावर अनेक प्रश्न उपस्थित केले. यावेळी ते म्हणाले की , “मुकेश अंबानी यांच्या घराबाहेर रात्री एक वाजता गाडी पार्क झाली. तीन वाजता ड्रायव्हर मागच्या गाडीतून पळून गेला. एकच गाडी नव्हती. स्कॉर्पियोपाठोपाठ आणखी एक गाडी आली. दोन्ही गाड्या ठाण्यातून आल्या. ही गाडी तिथे पार्क होती, तिची ओळख पटल्यानंतर सर्वात आधी मुंबई पोलीसांचे सचिन वाझे तिथे पोहोचले. कोणी पोहोचण्याच्याआधी ते आले. क्राईम पोलीस आहे. मग स्थानिक पोलीस आले. मग सचिन वाझेंना आयओ म्हणून अपॉइंट केलं. तीन दिवसांपूर्वी त्यांच्याऐवजी एका एसीपी यांना आयओ म्हणून नेमलं. सचिन वाझेंना का काढलं? हे मला समजलं नाही. पण यात योगायोग आहे. माझ्याकडे सीडीआर आहे. गाडीमालकाने गाडी चोरी झाल्याची तक्रार केली. ती गाडी उद्योगपती मुकेश अंबानीच्या घराबाहेर उभी होती. त्यांनी आपल्या जबाबात एक टेलिफोन नंबर सांगितला आहे. या नंबरचा एका नंबरशी संवाद ८ जून २०२०, २५ जुलै २०२० त्यानंतर अनेक वेळा झालेला दिसतोय. हा नंबर आहे सचिन हिंदुराव वाझे यांचा !! ज्या दिवशी ही गाडी ठाण्याला बंद पडल्यानंतर गाडी मालक ओला टॅक्सी घेऊन क्रोफोर्ड मार्केटला गेला. तिथे पोलीस आयुक्तांचे ऑफिस आहे. तिथे तो एका व्यक्तीला भेटला. ती व्यक्ती कोण? हा माझा प्रश्न आहे. हे जर शोधून काढलं तर सोपं आहे. ओला टॅक्सी मध्ये बसून गेला त्याचा रेकॉर्ड आहे. ओला च्या ड्रायव्हरने त्याला पाहिलंय, तो कोणाला भेटला हेही पाहिलंय. अश्या परिस्थितीत एव्हढे योगायोग कसे काय हेच समजत नाही.
वाझे ठाण्यात राहणारे, ज्याची गाडी अंबानी च्या घरासमोर पार्क केली होती तोही ठाण्यात राहणारा, घटनेच्या कितीतरी दिवसांपूर्वी त्यांचं फोनवरून संभाषण झालं आहे. म्हणजे ते एकमेकांना ओळखतात. खूप मोठे प्रश्न निर्माण झाले आहेत. ती गाडी दिसल्यावर पहिल्यांदा तिथे वाझे पोहोचले स्थानिक पोलीस नाही, क्राईम पोलीस नाही तर ते पोहोचले. हे धमकीचं पत्र वाझेंनाच मिळालं, त्यांनीच तिथे डिलिव्हर केलं. मग त्यानंतर योगायोग पहा. टेलिग्राम चॅनल तयार होत. जैश-उल-हिंद नावाने पत्र दाखवलं जात, जणू खंडणी मागण्याकरताच हे करण्यात आलं. मात्र जैश-उल-हिंद म्हणतं हे आमचं पत्रच नाही. खूप मोठी शंका या प्रकरणात तयार झाली आहे. म्हणून माझी मागणी आहे, हे पुरावे शंकेला वाव देणारे आहेत. ही टेरर ऍक्टिव्हिटी आहे. कारण जिलेटीन होतं. जैश-उल-हिंदचं नाव पुढे आलेलं आहे व उडवून देण्याची धमकी आहे. या संपूर्ण घटनेची चौकशी एनआयए द्यावी. हे योगायोग काय आहेत, याची चौकशी एनआयए ने करावी, अशी माझी मागणी आहे.”
मनसुख हिरेन यांचा मृतदेह आढळला
या प्रकरणात खळबळ उडाली ती मनसुख हिरेन यांचा मृतदेह आढळल्यानंतर. हिरेन यांचा मृतदेह मुंब्र्याच्या खाडीत आढळला. या प्रकरणी महाराष्ट्र एटीएसने हत्येचा गुन्हा दाखल केला आहे. मनसुख यांची पत्नी विमला हिरेन यांच्या फिर्यादीवरून हत्येचा गुन्हा दाखल करण्यात आला आहे. संशयास्पद मृत्यू प्रकरणाचा तपास दहशतवाद विरोधी पथकाकडे वर्ग करण्यात आला. ज्यावेळी एटीएसचं पथक मनसुख यांच्या घरी चौकशीसाठी दाखल झालं होतं. त्यावेळी मनसुख यांची आत्महत्या नसून हत्या झाली असल्याचा आरोप हिरेन यांच्या कुटुंबियांनी केला होता. अखेर विमला यांच्या फिर्यादीवरून मनसुख हिरेन प्रकरणी हत्येचा गुन्हा दाखल करण्यात आला आहे.
वाझेंकडून सत्र न्यायालयात अटकपूर्व जामिनासाठी अर्ज
मनसुख हिरेन मृत्यू प्रकरणात संशयाच्या भोवऱ्यात अडकलेले पोलीस अधिकारी सचिन वाझे यांची क्राईमब्रँच मधून बदली करण्यात आली आहे. आता ह्या प्रकरणात एपीआय सचिन वाझेंकडून सत्र न्यायालयात अटकपूर्व जामीनासाठी अर्ज दाखल करण्यात आलं. १९ मार्च रोजी त्यांच्या या अर्जावर सुनावणी होणार आहे. काल सचिन वाझे यांनी सेशन कोर्टात अटकपूर्व जामीनासाठी अर्ज दाखल केला आहे.
सचिन वाझे यांची नागरी सुविधा केंद्रात बदली
दरम्यान या प्रकरणात चर्चेत असलेले पोलीस अधिकारी सचिन वाझे यांची क्राईमब्रँच मधून बदली करण्यात आली. वाझे यांची नागरी सुविधा केंद्रात बदली करण्यात आली. पोलीस मुख्यालयातून सचिन वाझे यांच्या बदली संदर्भात आदेश काढण्यात आले आहेत.
सचिन वाझेंच खळबळजनक व्हाट्सएप स्टेटस
काल समोर आलेल्या सचिन वाझे यांच्या व्हाट्सएप स्टेटसने एकचं खळबळ उडाली. ‘जगाला गुड बाय म्हणायची वेळ आली आहे. आता माझ्याकडे पेशन्स नाहीत’, अशा आशयाचं व्हाट्सएप स्टेटस सचिन वाझेंनी ठेवलं होतं. सचिन वाझेंनी ठेवलेल्या व्हाट्सएप स्टेटस मध्ये म्हटलं की २००४ मध्ये त्यांना सीआयडीने अशाच चुकीच्या पद्धतीने अटक केलं होतं. माझ्या सहकारी कर्मचाऱ्यांनी मला फसवलं होत. मात्र त्यावेळी माझ्याकडे १७ वर्षाच्या अपेक्षा आणि नोकरी बाकी होती आणि पेशन्स देखील होते. मात्र आता माझ्याकडे ना १७ वर्षाचं आयुष्य आहे ना सहनशक्ती आहे ना नोकरी आहे. त्यामुळे जगाला ‘गुड बाय’ म्हणायची वेळ आली आहे, असं सचिन वाझेंनी म्हटलं. १७ वर्षांपूर्वी मला फसवण्याचा प्रयत्न केला गेला होता. तो आता दुसऱ्यांदाही होत आहे. ही स्टोरी चुकीची आहे. या सर्व गोष्टी राजकीय दबावापोटी आणि मीडिया ट्रोल मुळे होत आहेत. ४ आणि ५ मार्च रोजी मी साऊथ मुंबई मध्ये होतो आणि मनसुख हिरेन ठाण्यात होता आणि त्याचा मृतदेह मुंब्र्यात मिळाला, असंही वाझेंनी म्हटलं..
सचिन वाझे यांना अखेर अटक
काही दिवसांपूर्वी प्रसिद्ध उद्योजक मुकेश अंबानी यांच्या एंटिलिया निवासस्थानाबाहेर एक स्कॉर्पियो गाडीत स्फोटकं आढळली होती. या प्रकरणी सचिन वाझे यांना अटक करण्यात आली आहे. रात्री ११ वाजून ५० मिनिटांनी वाझे यांना अटक केल्याची खात्रीलायक माहिती एनआयए कडून देण्यात आली. अटकेपूर्वी तब्बल १३ तास सचिन वाझे यांची एनआयएकडून खडसावून चौकशी करण्यात आली. सचिन वाझे काल सकाळी ११ वाजताच एनआयएच्या कार्यालयात हजर झाले होते. तेव्हापासून त्यांची चौकशी सुरू होती. जवळपास १३ तासांच्या चौकशीअंती एनआयएने त्यांना अटक केली. आज (१४ मार्च) सकाळी ११ च्या सुमारास त्यांना कोर्टात हजर केले जाण्याची शक्यता आहे..
