मिरा भाईंदर, प्रतिनिधी : महाराष्ट्र प्रदेश युवक काँग्रेसचे प्रदेशाध्यक्ष सत्यजित तांबे बुधवार 17 फेब्रुवारी रोजी मिरा भाईंदर शहराच्या दौऱ्यावर होते, दौऱ्याच्या सुरवातीलाच शहरात त्यांचे आगमन झाल्यावर सर्वप्रथम त्यांनी काशिमिरा येथील शहराच्या प्रवेशद्वारावर छत्रपती शिवाजी महाराज यांच्या पुतळ्याला पुष्पहार अर्पण करून वंदन करून सुरवात केली, त्यानंतर मिरारोड येथील काँग्रेस कार्यालयात शहरातील नामांकित साहित्यिक, शिक्षक, प्राध्यापक, कला व क्रीडा क्षेत्रातील मान्यवरांसह आयोजित चर्चासत्रात सहभाग नोंदविला, यावेळी बोलताना ठाणे, नवी मुंबई ह्यासारख्या शहरांमध्ये सांस्कृतिक व कला क्षेत्राची एक चांगली चळवळ सुरु असते मात्र मिरा-भाईंदरमध्ये साधं नाट्यगृह सुध्दा नाही, अशी खंत उपस्थित विविध क्षेत्रातील कलाकार मान्यवरांनी सत्यजित तांबे यांच्या समवेत चर्चा करतांना मांडली.
शहरातील मिरारोड येथे महामार्गावर असलेला जुना पेट्रोल पंप येथे पेट्रोल-डिझेल दरवाढी विरोधात केंद्र सरकारला धारेवर धरत जोरदार घोषणाबाजी करत आंदोलन करण्यात आले. यावेळी महाराष्ट्र प्रदेश युवक कॉंग्रेसचे अध्यक्ष सत्यजित तांबे यांनी पेट्रोल पंपावर पेट्रोल भरण्यासाठी आलेल्या शहरातील नागरिकां समवेत संवाद साधला असता नागरिकांनी देखील मोदी सरकार विरोधात आपल्या तीव्र भावना व असंतोष व्यक्त करून काँग्रेसच्या घोषणामध्ये सामील होऊन नागरिकांनी आपले दुःख बोलून दाखवले.
सुपर १००० द्वारा संगठन मजबूत करण्यासाठी कामाला लागा, महाराष्ट्र प्रदेश युवक कॉंग्रेस अध्यक्षांचे कार्यकर्त्यांना आदेश!
भाईंदर पूर्व, गोडदेव नाका येथील शुभम हॉल येथे मिरा भाईंदर युवक काँग्रेस व ओवळा माजीवडा युवक काँग्रेसची बैठक पार पडली. या बैठकीस काँग्रेसचे नेते माजी विधानपरिषद सदस्य मुझफ्फर हुसैन, युवक प्रदेशाध्यक्ष सत्यजित तांबे, युवक प्रदेश उपाध्यक्ष ब्रिज दत्त, युवक ठाणे जिल्हाध्यक्ष आशिष गिरी, जिल्हाध्यक्ष प्रमोद जयराम सामंत, गटनेते, नगरसेवक झुबैर इनामदार, नगरसेवक अनिल सावंत, नगरसेवक अश्रफ शेख, नगरसेविका गीता परदेशी यांच्या सह मोठ्या संख्याने कार्यकर्ते, पदाधिकारी उपस्थित होते.
