नाशिक, प्रतिनिधि : महाराष्ट्रात गुटख्याच्या खरेदी-विक्री वर बंदी घालण्यात आली असली तरी राज्यात अनेक ठिकाणी प्रतिबंधित गुटख्याची वाहतूक व विक्री केली जात असल्याचे अनेक वेळा पहायला मिळत आहे. अनेकवेळा पोलीस अशा प्रकारे गुटख्याची चोरटी वाहतूक करणाऱ्यांवर आणि विक्री करणाऱ्यावर देखील कारवाई करतात तरी देखील पर राज्यातून महाराष्ट्रात प्रतिबंधित गुटखा येणे थांबलेले नाही.
अशातच नाशिक शहरात विक्रीसाठी आणलेला प्रतिबंधित गुटख्याची मोठी खेप पकडण्यात आली असून त्याची किंमत अंदाजे सव्वा कोटी असल्याचे बोलले जात आहे.
नाशिक जिल्हा पोलीस अधीक्षक श्री सचिन पाटील यांना मिळालेल्या गुप्त माहितीच्या आधारे शुक्रवारी, दि.16/01/2021 रोजी रात्रीचे सुमारास नाशिक ते सापुतारा महामार्गावर राजस्थान येथुन महाराष्ट्र राज्यात प्रतिबंधीत असलेला गुटखा व सुगंधी तंबाखु घेवुन दोन कंटनेर नाशिकच्या दिशेने येणार असल्याची पक्की खबर मिळाली होती. त्यानुसार पोलीस पथकाने करंजखेड फाटा, ता दिंडोरी व त्याच्या आसपासच्या परिसरात सापळा रचून 02 कंटेनर ताब्यात घेतले.
सदर दोन्ही कंटनेरची झडती घेतली असता त्यामध्ये मिराज कंपनीचा 1, 24, 34, 730/- रूपये किंमतीचा प्रतिबंधीत गुटखा सुगंधीत तंबाखुचा साठा मिळुन आला. सदर अवैध साठा घेऊन जाणारे ४ आरोपींना अटक करण्यात आली असून त्यांची नावे पुढीलप्रमाणे आहेत 1) महेंद्रसिंग शंबुसिंहानी सोलंकी, रा. उदयपुर, राजस्थान, 2) शामसिंग चतुरसिंहजी राव, रा. बिदसर, चितोडगड, राजस्थान, 3) अर्जुनसिंग जसवंतसिंग राणावत, रा. चितोडगड, राजस्थान, 4) लोगलजी मेहवाल, रा. उदयपुर, राजस्थान
या चार ही जणांना ताब्यात घेवुन त्यांचे कब्जातुन प्रतिबंधीत गुटखा व सुगंधीत तंबाखुचा साठा व त्यासोबत दोन कंटनेर वाहन असा एकुण 1, 64, 34, 730/- रुपये किंमतीचा मुद्देमाल हस्तगत करण्यात आला असल्याची माहिती पोलिसांनी दिली आहे. या बाबत वणी पोलीस ठाण्यात गुन्हा दाखल करण्यात आला असून पोलीस अधिकारी व अंमलदार पुढील तपास करीत आहे.
राज्यात गुटखा बंदी असली तरी देखील परराज्यातून चोरट्या मार्गाने या प्रतिबंधित गुटख्याची वाहतूक केली जात असल्याने त्याला पूर्णपणे आळा घालणे हे आता पोलिसां समोर एक मोठे आव्हान ठरत आहे.
