मिरारोड, प्रतिनिधी : मिरारोड पूर्वेकडील नयानगर येथील गंगा कॉम्प्लेक्स परिसरातील अनधिकृतपणे लावण्यात आलेले बॅनर काढण्यासाठी गेलेले महापालिकेचे प्रभाग अधिकारी आणि कर्मचारी यांना धक्कामुक्की करून आणि शिवीगाळ करत धमावुन सरकारी कामात अडथळा आणल्या प्रकरणी नयानगर पोलीस ठाण्यात अमनशक्ती चॅरिटेबल ट्रस्टचे अध्यक्ष अब्दुल रहमान मकबूल हुसेन शेख उर्फ रहमान कालिया आणि ट्रस्टचे सेक्रेटरी सलीम अजमुद्दीन शेख नावाच्या दोन इसमांवर गुन्हे दाखल करण्यात आले असून दोन्ही आरोपींना अटक करून न्यायालयात हजर केले असता त्यांना न्यायालयीन कोठडीत पाठविण्यात आले आहे.
याबाबत सूत्रांनी दिलेल्या माहिती नुसार महापालिका आयुक्त डॉ. विजय राठोड यांनी मिरा-भाईंदर शहराचे विद्रुपीकरण रोखण्यासाठी सोमवार दिनांक २१ डिसेंबर पासून मिरा-भाईंदर शहरातील सर्व अनधिकृत फेरीवाले आणि अनधिकृत बॅनर आणि होर्डिंग हटविण्याचे आदेश दिले आहेत त्यानुसार शहरातील सर्व अनधिकृत फेरीवाले आणि अनधिकृत बॅनर आणि होर्डिंग हटविण्याची मोहीम सुरु करण्यात आलेली आहे.
महापालिका आयुक्तांच्या आदेशानुसार प्रभाग क्रमांक ०४ चे प्रभाग अधिकारी आपल्या कर्माचार्यांसह नयानगर परिसरातील अनधिकृत बॅनर आणि होर्डिंग हटविण्याच्या कामात व्यस्त असताना लोधारोड येथील गंगा कॉम्प्लेक्स येथे अमनशक्ती चॅरिटेबल ट्रस्टचे अनधिकृत बॅनर काढीत होते त्यावेळी आरोपी अब्दुल रहमान शेख उर्फ रहमान कालिया आणि त्याचा साथीदार सलीम शेख यांनी घटना स्थळी येऊन बॅनर काढणाऱ्या कर्मचाऱ्यांना धमकावण्यास सुरुवात केली.
त्यावेळी कर्तव्यावर असलेले प्रभाग अधिकारी अविनाश जाधव यांनी मध्यस्थी करून सोडविण्याचा प्रयत्न केला असता त्यांनाही धक्कामुक्की करून बघून घेण्याची धमकी दिली आणि या ठिकाणी गर्दी जमवून शांतता भंग करण्याचा प्रयत्न केला.
प्रभाग अधिकारी अविनाश जाधव यांनी नयानगर पोलीस ठाण्यात फिर्याद दिली असून भादविसं चे कलम ३५३, ३२३, ५०६, १८८, २६९, २७०, ३४ त्याच प्रमाणे महाराष्ट्र कोव्हीड-१९ उपाययोजना नियम २०२० चे कलम ११ सोबत आपत्ती व्यवस्थापन अधिनियम २००५ चे कलम ५१(बी) व साथरोग प्रतिबंध अधिनियम १८९७ चे कलम २, ३, ४ नुसार गुन्हा दाखल करण्यात आलेला आहे.
नयानगर पोलिसांनी दोन्ही आरोपीना अटक केली असून सध्या आरोपीना न्यायालयीन कोठडीत पाठविण्यात आले असून ठाण्याच्या मध्यवर्ती कारागृहात पाठविण्यात आले असून नयानगर पोलीस प्रकरणाचा पुढील तपास करीत आहे.
