लोकहित न्युज

संपादक: मोईन सय्यद / प्रतिनिधी: अवधुत सावंत

डोंबिवली सारख्या सुशिक्षित आणि सुसंस्कृत समजल्या जाणाऱ्या शहरात नुकतीच शेजार धर्माला काळिमा फासणारी घटना समोर आली आहे. शेजारी राहणाऱ्या एका २२ वर्षीय नराधमाने ६ वर्षाच्या अल्पवयीन पीडित मुलीवर लैगिंक अत्याचार करण्याचा प्रयत्न केल्याची धक्कादायक घटना रामनगर येथील डोंबिवली पोलीस ठाण्याच्या हद्दीत घडली आहे. ही घटना डोंबिवली पूर्वेकडील आयरेगावात घडली असून याप्रकरणी डोंबिवली पोलीस ठाण्यात विनयभंगासह पोक्सो कायद्यानुसार गुन्हा दाखल करून पोलीसांनी नराधमाला अटक केली आहे. कुंदन रवींद्र चौहान (वय: २१ वर्ष) असे अटक नराधमाचे नाव आहे.

पोलीसांनी दिलेल्या माहितीनुसार पीडित अल्पवयीन मुलगी कुटुंबासह डोंबिवली पूर्वेकडील भागात आयरेगाव येथील एका चाळीत राहते. तर नराधम आरोपी हाही त्याच चाळीत शेजारी राहतो. विशेष म्हणजे आरोपी नराधम हा मूळचा उत्तरपदेश मधील आजमगडचा रहिवाशी असून तो काही दिवसापूर्वीच आयरेगावातील नातेवाईकाकडे आला होता. त्यातच ५ मे रोजी सायंकाळच्या सुमारास पीडित मुलगी त्याला घरा बाहेर दिसली होती. त्यावेळी तिला बहाण्याने नराधम त्याच्या घरात घेऊन गेला. त्यानंतर घराचा दरवाजा आतून बंद करत त्याने तिच्यावर लैगिंक अत्याचार करण्याचा प्रयत्न करत असतानाच, पीडितीचे आई तिला शोधत होती. त्याचवेळी मुलीच्या रडण्याचा आवाज आल्याने तिने बंद घराचा दरवाजा ठोकला असता, पीडित मुलगी रडतच बाहेर आली होती. त्यानंतर आईला संशय आल्याने मुलीकडे खोलवर चौकशी केली असता, तिने घडलेला प्रसंग आईला सांगताच आईला मोठा धक्काच बसला.

आईने तातडीने पीडित मुलीला घेऊन डोंबिवली पोलीस ठाणे गाठून मुलीवर घडलेल्या प्रसंगाचे कथन करताच, पोलीसांनी घटनेचं गांभीर्य ओळखून पीडितेच्या २६ वर्षीय आईच्या तक्रारीवरून आरोपी नराधमावर विनयभंगासह पोक्सो कायद्यानुसार गुन्हा दाखल करून त्याचा शोध सुरु केला. दरम्यान ७ मे रोजी त्याला ताब्यात घेऊन चौकशी करत त्याला पोलीसी खाक्या दाखवला असता त्याने अखेर पोलिसांना गुन्ह्याची कबुली दिली. त्यानंतर डोंबिवली पोलीसांनी त्याला बेड्या ठोकल्या असून त्याला न्यायालयात हजर केले असता त्या नाराधमाला अधिक पोलीस कोठडी सुनावली असून या गुन्ह्याचा पुढील तपास डोंबिवली पोलीस करत आहेत.

संपादक: मोईन सय्यद / प्रतिनिधी: अवधुत सावंत

महाराष्ट्रात महसूल गुप्तचर संचालनालयाला (डीआरआय) मोठे यश मिळाले आहे. डीआरआयने मुंबईत जवळपास ३.३५ किलो सोने जप्त केले आहे. त्याची किंमत सुमारे २.१ कोटी रुपये असल्याचे सांगितले जात आहे. गुप्तचर माहितीच्या आधारे डीआरआयने ही कारवाई केली आहे.

काय प्रकरण आहे ?

गुप्तचर माहितीच्या आधारे, महसूल गुप्तचर संचालनालयाच्या अधिकाऱ्यांनी मुंबईतील छत्रपती शिवाजी महाराज आंतरराष्ट्रीय विमानतळावर शोध घेतला. यावेळी त्यांनी एक प्रवासी, ड्युटी फ्री शॉपचे काही कर्मचारी आणि फूड कोर्टचे काही कर्मचारी पकडले. त्याच्याकडूनच ही वसुली करण्यात आली.

असे आहे रॅकेट

डीआरआयने दिलेल्या माहितीनुसार हे सोने पेस्टच्या स्वरूपात जप्त करण्यात आले आहे. त्याचे वजन सुमारे ३.३५ किलो आहे. या सोन्याची आंतरराष्ट्रीय बाजारात किंमत अंदाजे २.१ कोटी रुपये इतकी आहे. विमानतळाचे कर्मचारी हे तस्करीचे सोने विमानतळाबाहेर नेऊन विविध ठिकाणी पुढील व्यक्तीकडे सुपूर्द करायचे.

संपादक: मोईन सय्यद / प्रतिनिधी: अवधुत सावंत

कल्याण पश्चिम येथे गुंगीचे औषध देऊन बेशुद्ध झालेल्या गोवंशीय जातीची जनावरं स्विफ्ट गाडीच्या डिक्कीत भरुन तस्करी सुरु होती. कल्याण बाजारपेठ पोलीसांनी छापा मारून एका आरोपीला ताब्यात घेत २ गोवंशीय जातीच्या जनावरांची सुटका केली आहे. तर ५ आरोपी फरार झाले आहेत. कल्याण पश्चिमेत गोवंशीय जातीच्या जनावरांना गुंगीचे औषध देत बेशुद्धावस्थेत स्विफ्ट गाडीच्या डिक्कीत भरुन तस्करी करत असल्याचा धक्कादायक प्रकार उघडकीस आला आहे. या प्रकरणी बाजारपेठ पोलीसांनी छापा मारत सोयब निजाम करके या आरोपीला रंगेहाथ पकडत २ गोवांशीय जातीच्या जनावरांची सुटका केली आहे. बाजारपेठ पोलीसांनी एक रिक्षा आणि २ स्विफ्ट गाड्या असा एकूण २,६०,००० /- रुपयेचा मुद्देमाल जप्त केला आहे. या प्रकरणी बाजारपेठ पोलीसांनी महाराष्ट्र प्राणी संरक्षण अधिनियमनानुसार गुन्हा दाखल करत या तस्करीत फरार झालेल्या ५ आरोपींचा शोध सुरू केला आहे.

कल्याण बाजारपेठ पोलीसांना कल्याण पश्चिमेकडील रेतीबंदर खाडी परीसरात जीन्स कारखान्याजवळ सार्वजनिक मोकळी जागा आहे. या ठिकाणी गाईंना आणून त्यांची कत्तल केली जात असल्याची माहिती बाजारपेठ पोलीस ठाण्याचे सहाय्यक पोलीस निरीक्षक घोलप यांना मिळाली होती. त्यानंतर बाजारपेठ पोलीस ठाण्याचे सपोनि अरुण घोलप, पोलीस हवालदार सचिन साळवी, प्रेम बागुल, बाविस्कर, पावसे व पोलीस नाईक कातकडे, फड यांच्या पथकाने कल्याण पश्चिम येथील सर्वोदय सागर इमारतीच्या शेजारी खाडीकिनारी छापा मारत आरोपी सोयब निजाम करके (वय: ३२ वर्ष) याला रंगेहात पकडत २ गाईंची सुटका केली. तर या छापेमारी दरम्यान १) इब्राहिम इस्माईल मजीद उर्फ पापा हड्डी, २) अरबाज, ३) गोरू, ४) मच्छी, ५) आवली, ६) बारक्या असे सहा आरोपी फरार झाले आहेत. नमूद २ गोवंशीय जातीच्या जनावरांना बापगांव गोशाळा येथे पुढील संगोपनासाठी जमा करण्यात आले आहे.

बाजारपेठ पोलीसांनी प्रसिद्धी माध्यमांना दिलेल्या माहितीनुसार हे सर्व आरोपी संगनमत करून ग्रामीण भागात रानामध्ये चारा खात असलेल्या गोवंशीय जातीच्या जनावरांना गुंगीचे इंजेक्शन मारायचे आणि नंतर ही जनावर खाली बेशुद्ध पडल्यानंतर त्यांना एका चादरीमध्ये गुंडाळून पाच ते सहा जण मिळून त्यांना स्विफ्ट गाडीच्या डिक्कीमध्ये भरून वाहतूक करून कत्तल  करायचे.