लोकहित न्युज

संपादक: मोईन सय्यद / प्रतिनिधी: अवधुत सावंत

२०२४ च्या लोकसभा आणि विधानसभा निवडणूकीसाठी राज्यातील सर्वच पक्ष मोर्चेबांधणीला लागले असताना भारतीय निवडणूक आयोगाच्या एका निर्णयाने राष्ट्रवादी काँग्रेसला मोठा धक्का दिला आहे. निवडणूक आयोगाने राष्ट्रवादी काँग्रेसचा राष्ट्रीय पक्षाचा दर्जा काढून घेतला आहे, त्यामुळे आता राष्ट्रवादी राष्ट्रीय पक्ष राहणार नसून निवडणूक आयोगाच्या या निर्णयामुळे राष्ट्रवादीला महाराष्ट्राबाहेर घड्याळ या चिन्हावर निवडणूक लढता येणार नाही. त्याचबरोबर निवडणूक आयोगाने भारतीय कम्युनिस्ट पक्षाचा राष्ट्रीय पक्षाचा दर्जा रद्द केला. सीपीआय आता केरळ, मणिपूर आणि तामिळनाडूमध्ये राज्याचा दर्जा असलेला राज्य पक्ष म्हणून गणला जाईल.

हे आहेत राष्ट्रीय पक्षासाठीचे निकष

जो राजकीय लोकसभा निवडणुकीवेळी चार किंवा त्यापेक्षा जास्त राज्यांमध्ये ६ टक्क्यांपेक्षा जास्त मतं प्राप्त करेल अशाच पक्षाला निवडणूक आयोगाकडून राष्ट्रीय पक्षाचा दर्जा दिला जातो. याशिवाय पक्षाला लोकसभेच्या एकूण जागांच्या २ टक्के म्हणजेच तीन राज्यांमधून ११ जागा जिंकाव्या लागतात.

राष्ट्रीय पक्षाचा दर्जा मिळाल्यामुळे सर्व राज्यांमध्ये त्यांना एकाच चिन्हावर निवडणूक लढण्यात येते. तसंच दिल्लीमध्ये राष्ट्रीय पक्षाच्या कार्यालयाला जागा दिली जाते. निवडणुकीच्या वेळी सरकारी प्रक्षेपणांमध्ये वेळही दिला जातो.

घड्याळाला अन्य राज्यात बंदी

१९६८ सालच्या सिम्बॉल ऑर्डरनुसार एखाद्या पक्षाची राष्ट्रीय मान्यता गेली तर त्याला देशभरातल्या राज्यांमध्ये एकाच चिन्हावर निवडणूक लढता येत नाही. निवडणूक आयोगाच्या या निर्णयामुळे राष्ट्रवादीला इतर राज्यांमध्ये पुढच्या निवडणुका ‘घड्याळ’ या चिन्हावर लढता येणार नाहीत. पण राष्ट्रवादीला महाराष्ट्रातला प्रादेशिक पक्ष म्हणून दर्जा असल्यामुळे त्यांना महाराष्ट्रात घड्याळ या चिन्हावर निवडणूक लढता येईल.

आम आदमी पक्षाला राष्ट्रीय दर्जा

दरम्यान निवडणूक आयोगाने आम आदमी पक्षाला राष्ट्रीय पक्षाचा दर्जा दिला आहे. आम आदमी पक्षाला ‘झाडू’ नॅशनल पार्टी म्हणून निवडणूक चिन्ह देण्यात आले आहे. आम आदमी पक्षाने राष्ट्रीय पक्ष होण्याच्या सर्व अटी पूर्ण केल्या आहेत, असे निवडणूक आयोगाने प्रसिद्धी पत्रकात म्हटले आहे.

संपादक: मोईन सय्यद / प्रतिनिधी: अवधुत सावंत

महाराष्ट्राचे मुख्यमंत्री एकनाथ शिंदे यांनी अयोध्येला भेट देऊन श्रीरामाचे दर्शन घेतले आणि प्रस्तावित मंदीर प्रकल्पाची पहाणी केली. शिवसेनेच्या गटाला ‘धनुष्य आणि बाण’ चिन्ह मिळाल्याचे चिन्ह प्रभू रामाचा आशीर्वाद त्यांच्यासोबत आहेत, असे प्रतिपादन करत त्यांनी पत्रकारांशी संवाद साधला. यावेळी शिंदे यांनी अयोध्येमध्ये हिंदु हृदय सम्राट बाळासाहेब ठाकरे यांच्या नावाने भव्य महाराष्ट्र भवन उभारले जाईल. अशी घोषणा केली.

“आजचा हा दिवस माझ्यासाठी अभूतपूर्व असा दिवस आहे. मंदीर हा आमच्यासाठी राजकीय नव्हे तर अस्मितेचा विषय आहे. राममंदीर उभारणी हिंदु हृदय सम्राट बाळासाहेब ठाकरे आणि धर्मवीर आनंद दिघे यांचे स्वप्न होते, ते स्वप्न आज येथे प्रत्यक्षात साकारत आहे. हे स्वप्न पंतप्रधान मोदी पूर्णत्वास नेत आहेत”. अशी भावना मुख्यमंत्री शिंदे यांनी व्यक्त केली.

मुख्यमंत्री शिंदे म्हणाले की, या दौऱ्याचा काहींना त्रास झाला, कारण त्यांना हिंदुत्वाची ऍलर्जी आहे. हे लोक हिंदू धर्माबद्दल चुकीचा प्रचार करत होते. त्यांना वाटतं की, हिंदूत्व जर सर्वांच्या घराघरात, मनामनात पोहोचलं तर त्यांची राजकीय दुकानं बंद होतील. या भितीमुळे हे लोक हिंदुत्वाला, हिंदू धर्माला विरोध करत आले आहेत.

संपादक: मोईन सय्यद / प्रतिनिधी: अवधुत सावंत

मुख्यमंत्री एकनाथ शिंदे अयोध्या दौ-यावर जात आहेत. यावेळी मुख्यमंत्र्यांसोबत शिवसेना आमदार, खासदार, मंत्री तसंच शिवसेना पदाधिकारीही उपस्थित असणार आहेत. पण या अयोद्धा दौ-यावर भाजपाची नजर असणार असुन भाजपाचे तीन मंत्री देखील एकनाथ शिंदे यांच्यासोबत असणार आहे. त्यामुळे भाजपाचा एकनाथ शिंदे यांच्यावर कायम वॉच राहणार आहे.

राज्यात सत्तांतर होऊन एकनाथ शिंदे मुख्यमंत्री आणि देवेंद्र फडणवीस उपमुख्यमंत्री बनले आहेत. पण राजकारणात काहीही होऊ शकते ही शक्यता गृहीत धरून भाजपा कायमचं एकनाथ शिंदे यांच्यावर नजर ठेऊन असते. मुख्यमंत्र्याच्या काही कार्यक्रमात तर शिवसेनेचा एकही प्रतिनिधी नसतो पण भाजपाचा कोणतातरी नेता किंवा आमदार कायम असतो त्यामुळे भाजपा मुख्यमंत्री एकनाथ शिंदे यांच्यावर वॉच ठेवत असल्याची चर्चा राजकीय वर्तुळात होत असते.

आताही मुख्यमंत्री एकनाथ शिंदे अयोध्या दौऱ्यासाठी जात असताना भाजपचे नेतेदेखील अयोध्या दौऱ्यावर जाणार आहेत. मुख्यमंत्री एकनाथ शिंदे यांच्यासोबत महसूलमंत्री राधाकृष्ण विखे पाटीलही अयोध्येमध्ये जाणार आहेत. दुसरीकडे मुख्यमंत्र्यांसोबत भाजप नेते गिरीश महाजन आणि संजय कुटे हे देखील अयोध्या दौऱ्यावर जातील. संजय कुटे यांची ओळख उपमुख्यमंत्री देवेंद्र फडणवीस यांचे निकटवर्तीय म्हणून आहे. त्यामुळे अयोध्या दौऱ्यावर भाजपाचे लक्ष असणार आहे. दरम्यान मुख्यमंत्री आणि शिवसेना नेते, कार्यकर्ते अयोध्येमध्ये प्रभू श्रीरामाचं दर्शन घेणार आहेत. अयोध्या दौऱ्यामध्ये मुख्यमंत्री एकनाथ शिंदे उत्तर प्रदेशचे मुख्यमंत्री योगी आदित्यनाथ यांची भेटही घेणार आहेत.

शरयू नदीवर महाआरती करून मुख्यमंत्र्यांच्या अयोध्या दौऱ्याची सांगता होणार आहे. शिवसैनिक याआधीच स्पेशल ट्रेनने अयोध्येला पोहोचले आहेत. राज्यात यशस्वी सत्तांतर झाल्यानंतर मुख्यमंत्री एकनाथ शिंदे हे आपल्या गटाच्या आमदारांना घेऊन गुवाहाटी दौऱ्यावर गेले होते. त्यावेळी भाजपाकडून मंत्री रवींद्र चव्हाण आणि मोहित कंबोज हे देखील गेले होते. त्यावेळी यावरुन बरेच तर्कवितर्क लढवले गेले होते.