मिरारोड, प्रतिनिधी: मिरारोडच्या वोक्हार्ट हॉस्पिटल्स येथील स्रीरोग व प्रसुती तज्ज्ञ डॉ रचना शर्मा यांच्या नेतृत्वाखालील टीमला 39 वर्षीय महिला रुग्णाच्या गर्भाशयातून 2.25 किलो वजनाचे फायब्रॉइड काढण्यात यश आले आहे.
गर्भाशयात असलेल्या विविध आकाराच्या अनेक फायब्रॉइड्समुळे आणि गर्भाशयाच्या अवयवाची रचना विकृत झाल्यामुळे रुग्णाला मासिक पाळीत असामान्य रक्तस्त्रावाची तक्रार होती. तिला भविष्यात तिला गर्भधारणेत अडचणी येणार नाही याची देखील पुरेपुर खबरदारी घेण्यात आली.
महिला रुग्ण आयुषी मेहरा (नाव बदलले आहे) ही एक गायिका आहे तिला मासिक पाळीत होणारा अतिरिक्त रक्तस्त्राव, वेदनादायक पाळी अशा तक्रारी होत्या. वेदना वाढत गेल्याने तिची प्रकृती ढासळू लागली आणि तिच्या दैनंदिन कामात व्यत्यय येऊ लागला. रुग्णाला वोक्हार्ट हॉस्पिटल, मिरारोड येथे पाठवण्यात आले जेथे तिला त्वरित वैद्यकीय मदत मिळाली.
फायब्रॉइड्समुळे महिलेचे पोट गर्भवती स्री सारखे दिसू लागले होते.
डॉ. रचना शर्मा सांगतात गर्भाशयातील फायब्रॉइड्स ही एक अशी स्थिती आहे जिथे स्त्रीच्या गर्भाशयात कर्करोग नसलेल्या गाठी दिसून येतात. उपचार न केल्यास, ते आकाराने मोठ्या होतात आणि मूत्राशय आणि आतड्यांसारख्या आसपासच्या अवयवांवर दबाव टाकतात. फायब्रॉइड सामान्यतः सर्व वयोगटातील महिलांमध्ये दिसून येतात. स्त्रिया आपल्या आरोग्याकडे दुर्लक्ष करतात आणि त्यामुळे अनेकदा गंभीर गुंतागुंत निर्माण होते.
या रुग्णाला काही वर्षांपासून मासिक पाळीदरम्यान तीव्र वेदना होत होत्या. सोनोग्राफीमध्ये गर्भाशयाचे मोठे फायब्रॉइड दिसले, सर्वात मोठे 12″-13″ होते. तिला प्रथम मायोमेक्टॉमी करण्याचा सल्ला देण्यात आला होता, म्हणजे प्रजननक्षमतेला हानी न पोहोचविता फायब्रॉइड्स काढून टाकणे.
डॉ रचना पुढे म्हणाल्या, आम्ही प्रसंगावधान राखुन या शस्त्रक्रियेचे नियोजन केले. सहसा अशा मोठ्या फायब्रॉइड्ससह, संपूर्ण गर्भाशय काढून टाकले जाते, कारण यात गर्भाशयाला वाचवणे आव्हानात्मक ठरते. परंतु रुग्णाला भविष्यात गर्भधारणा करायची असल्याने ते आव्हान पेलत तिचे गर्भाशय वाचविण्यात आले. सोनोग्राफीमध्ये 9 मोठ्या आकाराचे फायब्रॉइड आणि इतर लहान फायब्रॉइड्स दिसून आले. आम्ही एकूण 14 फायब्रॉइड्स काढले ज्यांचे वजन सुमारे 2.25 किलो होते.
आम्ही एकाच चीराद्वारे शक्य तितक्या फायब्रॉइड्स काढल्या, कारण गर्भाशयावर अधिक चीरे तिच्या भावी गर्भधारणेसाठी धोकादायक असतील. ही मोठी शस्त्रक्रिया असल्याने ती पूर्ण होण्यासाठी ४ तासांपेक्षा जास्त वेळ लागला. एनेस्थेसिया देत ही शस्त्रक्रिया यशस्वीरित्या पार पडली.
शस्त्रक्रियेनंतर रुग्ण बरा झाला आणि 36 तासांनंतर आहाराचे सेवन केले. वोक्हार्ट हॉस्पिटल्स मिरारोड येथील “ममा केअर” युनिट कोणत्याही आपत्कालीन परिस्थितीला योग्यरित्या हाताळून सर्व सुविधांनी सुसज्ज आहे.
“माझ्या शरीरात अनेक फायब्रॉइड्स वाढत आहेत हे मला माहीत देखील नव्हते. मला क्रॅम्पिंग, वेदनादायक मासिक पाळी आणि असामान्य मासिक रक्तस्त्राव होत होता. माझे शरीर फुगले होतो आणि असह्य वेदना होत होत्या. गर्भाशयात तब्बल 14 फायब्रॉइड्स असल्याचे समजल्यावर मला धक्काच बसला. यशस्वी शस्त्रक्रिया केल्याबद्दल मी वोक्हार्ट हॉस्पिटलमधील डॉक्टरांचे आभार मानते. माझ्यासाठी हा एक चमत्कारच होता कारण डॉक्टरांनी माझ्या गर्भाशयाचे रक्षण केले. मला आनंद आहे की मला नवीन आयुष्य मिळाले आहे,” असे सांगून रुग्ण आयुषी मेहरा (नाव बदलले आहे) यांनी आपल्या भावना व्यक्त केल्या.
