लोकहित न्युज

संपादक: मोईन सय्यद / प्रतिनिधी: अवधुत सावंत

राज्यातील महाविद्यालयीन विद्यार्थ्यांसाठी महत्वाची बातमी आहे. पुढील शैक्षणिक वर्षापासून पदवी अभ्यासक्रमासाठी (ग्रॅज्युएट) कॉलेजमध्ये प्रवेश घेताना, इतर महत्वाच्या कागदपत्रांसोबत मतदार ओळखपत्रही द्यावे लागणार आहे. राज्याचे उच्च व तंत्र शिक्षणमंत्री चंद्रकांत पाटील यांनी ही माहिती दिली.

वयाची १८ वर्षे पूर्ण झाली असल्यास, काॅलेजमध्ये पदवीला प्रवेश घेताना विद्यार्थ्यांना इतर कागदपत्रांसोबत ‘व्होटर आयडी’चीही झेराॅक्स द्यावी लागेल. कॉलेजला प्रवेश घेताना विद्यार्थ्यांची मतदार नोंदणी झाली की नाही, याची तपासणी केली जाणार आहे. मतदार जनजागृती करण्यासाठी राज्य सरकारने हा निर्णय घेतल्याचेही मंत्री चंद्रकांत पाटील यांनी सांगितले.

ते म्हणाले, की पदवी अभ्यासक्रमासाठी प्रवेश घेताना, विद्यार्थ्यांना अनेक कागदपत्रे सादर करावी लागतात. आता त्यात मतदार ओळखपत्राचीही भर पडणार आहे. विद्यार्थ्यांनी मतदार नोंदणी केली की नाही, याची तपासणी प्रवेश देताना कॉलेजकडून केली जाईल. जेणेकरून लोकशाहीची मूल्यं जोपासत मतदार नोंदणीचे कामही यानिमित्ताने होणार आहे.

पदवीचा अभ्यासक्रम चार वर्षांचा

दरम्यान, पुढील वर्षीपासून पदवीचा अभ्यासक्रम चार वर्षांचा केला जाणार आहे. यासंदर्भात यूजीसीने मसूदा तयार केला असून, त्यांच्या गाईडलाईननुसार चार वर्षांचा पदवी अभ्यासक्रम असेल. या अभ्यासक्रमाचा आराखडा तयार करण्याच्या सूचना मंत्री चंद्रकांत पाटील यांनी शिक्षण विभागाला दिल्या आहेत.

शिक्षण विभागाच्या नवीन निर्णयाच्या अंमलबजावणीसाठी प्राध्यापक, कर्मचाऱ्यांना तयारी करावी लागेल. त्यात काही अडचणी आल्यास, सेवानिवृत्त कुलगुरूंची समिती वेळोवेळी मार्गदर्शन करणार असल्याचेही पाटील यांनी सांगितले.

संपादक: मोईन सय्यद / प्रतिनिधी: अवधुत सावंत

राष्ट्रीय संरक्षण प्रबोधिनी (खडकवासला) आणि नौदल अकादमी (एझिमला,केरळ) यांच्यासाठी युपीएससी तर्फे घेण्यात आलेल्या प्रवेश परीक्षेत अनुष्का बोर्डे आणि वैष्णवी गोर्डे यांनी देशात अनुक्रमे दुसरा आणि तिसरा क्रमांक मिळवून सुयश प्राप्त केले आहे. या परीक्षेत एकूण ५१९ विद्यार्थी उत्तीर्ण झाले आहेत. रुबीन सिंहने या परीक्षेत पहिल्या क्रमांकाचे यश मिळवले आहे.

युपीएससी कडून १० एप्रिल रोजी घेण्यात आलेल्या प्रवेश परीक्षेत यश मिळवलेल्या विद्यार्थ्यांच्या सर्विसेस सिलेक्शन बोर्डाद्वारे मुलाखती घेण्यात आल्या. त्यानंतर हा अंतिम निकाल जाहिर करण्यात करण्यात आला. मागील वर्षी सर्वोच्च न्यायालयाने दिलेल्या निर्णयानुसार मुलींना या संरक्षण दलाच्या या परीक्षांमध्ये समान संधी देण्यात आली होती. जून २०२२ पासून एनडीए मध्ये मुलींची पहिली तुकडी प्रशिक्षणासाठी दाखल झाली. आता अनुष्का आणि वैष्णवी यांनी मिळवलेले हे यश पाहून अनेक मुलींना या स्पर्धेचे क्षितिज खुणावू लागेल असा विश्वास वाटत आहे.

संपादक: मोईन सय्यद / प्रतिनिधी: अवधुत सावंत

दिवा शहराची लोकसंख्या पाच लाखाच्या घरात गेली आहे. येथील नागरिकांची गैरसोय टाळण्यासाठी दिव्यात नवीन रेशनिंग ऑफिस व नवी रेशनिंग दुकानांना परवानगी मिळावी अशी मागणी भारतीय जनता पार्टी भटके विमुक्त आघाडीचे महाराष्ट्र प्रदेश सरचिटणीस शिवाजी आव्हाड यांनी सार्वजनिक बांधकाम मंत्री व अन्न नागरी पुरवठा मंत्री रविंद्र चव्हाण यांची भेट घेऊन केली. यावेळी भाजपचे शिवाजी आव्हाड यांच्या प्रत्यक्ष भेट व मागणी नंतर मंत्री रवींद्र चव्हाण यांनी तात्काळ फोनवरून याबाबत कार्यवाही करण्याचे आदेश संबंधित अधिकाऱ्यांना दिले.

ठाणे जिल्ह्यातील दिवा शहराची लोकसंख्या मागील काही वर्षात वेगाने वाढत आहे. वाढत्या लोकसंख्येच्या तुलनते येथे प्रशासकीय व्यवस्था अस्तित्वात नाही. रेशनिंग सुविधांच्या बाबत येथील नागरिकांना डोंबिवली व मुंब्रा या शहरांवर अवलंबून राहावे लागते. दिवा शहरात रेशनिंग ऑफिस नसल्याने व रेशनिंग दुकानांचे जाळे मजबूत नसल्याने नागरिकांची गैरसोय होत असते. नागरिकांची हीच अडचण लक्षात घेऊन भारतीय जनता पार्टीचे भटके विमुक्त आघाडीचे प्रदेश सरचिटणीस शिवाजी आव्हाड यांनी या गंभीर विषयावर मंत्री रविंद्र चव्हाण यांची भेट घेऊन दिवा शहरात रेशनिंग ऑफिस व वाढीव रेशनिंग दुकाने यांना मंजुरी द्यावी अशी मागणी केली. या मागणीची तातडीने दखल घेत मंत्री चव्हाण यांनी संबंधित अधिकारी यांना याबाबत आदेश दिले असल्याची माहिती शिवाजी आव्हाड यांनी दिली.