लोकहित न्युज

संपादक: मोईन सय्यद / प्रतिनिधी: अवधुत सावंत

राज्याच्या प्रगतीत केंद्र शासनाच्या सहकार्याची महत्त्वाची भूमिका असून केंद्राच्या भक्कम पाठिंब्याने महाराष्ट्राचा सर्वतोपरी विकास साधणार असल्याचा विश्वास मुख्यमंत्री एकनाथ शिंदे यांनी व्यक्त केला.

मुख्यमंत्री एकनाथ शिंदे आणि उपमुख्यमंत्री देवेंद्र फडणवीस दोन दिवसांच्या दिल्ली भेटीवर असून त्यांनी राष्ट्रपतींसह केंद्रीय मंत्र्यांच्या भेटी घेतल्या. याविषयी माहिती देण्यासाठी महाराष्ट्र सदनात आयोजित पत्रकार परिषदेत मुख्यमंत्री एकनाथ शिंदे बोलत होते. यावेळी उपमुख्यमंत्री देवेंद्र फडणवीस उपस्थित होते. एकनाथ शिंदे म्हणाले, सर्वसामान्य जनता, शेतकरी व समाजाच्या सर्व घटकांच्या विकासासाठी आम्ही सरकार स्थापन केले आहे. हे सरकार राज्यातील  सर्व घटकांच्या हितांची जपणूक करण्यासाठी कार्यरत राहील व यासाठी केंद्र शासनाच्या सहकार्याची आवश्यकता आहे, म्हणूनच सरकार स्थापनेनंतर शिष्टाचाराप्रमाणे राष्ट्रपती, प्रधानमंत्री व केंद्रीय मंत्र्यांच्या सदिच्छा भेटी घेण्यासाठी उपमुख्यमंत्र्यासह दिल्लीत आलो असल्याचे त्यांनी सांगितले. प्रधानमंत्री नरेंद्र मोदी यांचा महाराष्ट्राच्या विकासाबाबतचा दृष्टीकोन समजून घेऊन केंद्राच्या सहकार्याने राज्याला प्रगतीपथावर घेऊन जाण्यासाठी राज्य सरकार प्रयत्नशील राहील, असा विश्वासही त्यांनी यावेळी व्यक्त केला.

राष्ट्रपती, प्रधानमंत्री यांची सदिच्छा भेट

मुख्यमंत्री आणि उपमुख्यमंत्री  शुक्रवारी सायंकाळी दिल्लीत दाखल झाले. त्यांनी रात्री केंद्रीय गृह तथा सहकार मंत्री अमित शहा यांची ६ ए, कृष्ण मेनन मार्ग या शासकीय निवासस्थानी सदिच्छा भेट घेतली. सकाळी त्यांनी राष्ट्रपती भवनात राष्ट्रपती रामनाथ कोविंद यांची तर दुपारी प्रधानमंत्री नरेंद्र मोदी यांची ७, लोक कल्याण मार्ग या शासकीय निवासस्थानी सदिच्छा भेट घेतली.

तत्पूर्वी, त्यांनी संरक्षण मंत्री राजनाथ सिंह यांची १७, अकबर रोड या शासकीय निवासस्थानी सदिच्छा भेट घेतली.

संपादक: मोईन सय्यद / प्रतिनिधी: अवधुत सावंत

मागच्या बऱ्याच दिवसांपासून महाराष्ट्रात सुरु असलेलया राजकीय नाट्याच्या पहिल्या अंकाला पूर्णविराम लागला असं म्हणता येईल. शिवसेनेचे बंडखोर आमदार एकनाथ शिंदे यांनी राज्याच्या मुख्यमंत्री पदाची शपथ घेतली आणि त्यानंतर संपूर्ण महाराष्ट्राला यंदाची विठ्ठल महापूजा मुख्यमंत्री एकनाथ शिंदे करणार हे स्पष्ट झालं. नुकतीच काही दिवसांपूर्वी एकनाथ शिंदे यांनी भाजपच्या मदतीने मुख्यमंत्रिपदाची शपथ घेतली त्यामुळे शिंदे यांनाच शासकीय महापूजेचा मान मिळणार आहे. उद्या म्हणजे रविवारी पहाटे विठ्ठलाची शासकीय महापूजा मुख्यमंत्र्यांच्या हस्ते होईल.

एकीकडे मुख्यमंत्री एकनाथ शिंदे उद्या आषाढी एकादशीच्या सोहळ्यासाठी पंढरपूर दौऱ्यावर येत आहेत. मात्र, दुसरीकडे राज्यात नगरपालिका निवडणूक जाहीर झाल्याने आचारसंहिता लागू झाली असून मुख्यमंत्र्यांच्या या दौऱ्यासाठी जिल्हा प्रशासनाने राज्य निवडणूक आयोगाकडे परवानगी मागितली आहे. निवडणूक आयोगाद्वारे परवानगी मिळाल्यासच मुख्यमंत्र्यांना पंढरपूर दौरा करता येणार आहे.

खरं तर, निवडणुकीच्या पार्श्वभूमीवर आदर्श आचारसंहिता लागू झाल्यानंतर नेमक्या कोणत्या कार्यक्रमांना निवडणूक आयोग परवानगी देईल, यावर मुख्यमंत्र्यांचा दौरा अवलंबून असेल. मात्र अशा प्रकारची वेळ पहिली नाही. मागील काही वर्षांपूर्वी कार्तिकी यात्रेला आचारसंहिता लागू झाली होती. त्यावेळेस तत्कालीन मंत्री चंद्रकांत पाटील यांना शासकीय महापूजेस परवानगी देण्यात आली होती. त्यामुळे यंदाही मुख्यमंत्री एकनाथ शिंदे यांना महापूजेची परवानगी मिळेल अशी माहिती समोर आली आहे.

मुख्यमंत्री एकनाथ शिंदे यांच्या दौऱ्यादरम्यान, विश्रामगृह येथे ‘पर्यावरणाची वारी, पंढरीच्या दारी!’ याचा समारोप सोहळा होईल. एकादशीच्या दिवशी पहाटे शासकीय महापूजा झाल्यावर पहाटे इस्कॉन आंतरराष्ट्रीय मंदिराचा भूमिपूजन कार्यक्रम नियोजित आहे. तसंच सकाळी ११ वाजता सुंदर माझे कार्यालय, स्वच्छता दिंडी समारोप आणि दुपारी मुख्यमंत्री एकनाथ शिंदे हे शिवसेना पक्षाच्या मेळाव्यास हजेरी लावणार आहेत.