संपादक: मोईन सय्यद/प्रतिनिधी: अवधुत सावंत
आर्थिक गुन्हे शाखा, ठाणे शहर च्या पोलिसांनी गुंतवणुकीच्या नावाखाली पैसे डबल करण्याचे आमिष दाखवून अनेकांना फसवल्याच्या गुन्ह्यात एका आरोपीला अटक केली आहे. सदर आरोपी चेतन जीवराज दंड याने २०१४ पासून ‘देसार इन्वेस्ट्मेन्ट्स’ या नावाने कंपनीची जाहिरात ‘फेसबुक’ आणि ‘गुगल’ वर प्रसारित केली. प्रत्यक्षात त्याने अशी कोणतीही कंपनी रजिस्टर केली नाही. रजिस्ट्रेशन न करताच त्या कंपनीच्या देसार इन्वेस्ट्मेन्ट्सच्या नावाखाली त्याने लोकांना यात गुंतवणूक करायला प्रवृत्त करण्यासाठी गुंतवणुकीच्या रकमेवर दरमहा ५% प्रमाणे परतावा देण्याचे आमिष दाखवीले.
फिर्यादी आणि इतर गुंतवणूकदारांनी पैसे गुंतवल्यावर काहीकाळ त्यांना ठरल्याप्रमाणे परतावाही दिला. मात्र नोव्हेंबर २०१९ पासून फिर्यादी व साक्षीदार यांना कोणताही परतावा दिलेला नाही तसेच त्यांची मुद्दलही त्यांना परत न करता २,१३,२५,०१७ रुपयांची फसवणूक केल्याच्या तक्रारीवरून गुन्हा दाखल झाला आणि ६ जुलै रोजी आरोपीला अटक करण्यात आली.
अशा बनावट कंपन्या गुंतवणुकीतून अधिक फायदा मिळवून देण्याचे आमिष दाखवून गुंतवणूकदारांना फसवू शकतात त्यामुळे अशा आमिषांना बळी न पडण्याचे आवाहन पोलिसांकडून जनहितार्थ करण्यात येत आहे.
