लोकहित न्युज

संपादक: मोईन सय्यद / प्रतिनिधी: अवधुत सावंत

एकीकडे कल्याण-डोंबिवली महानगरपालिका हद्दीतील २७ गावांमध्ये पाणी भीषण टंचाई निर्माण झाली आहे. तर दुसरीकडे याच २७ गावांत असलेल्या कल्याण-शिळ महामार्गावरील ‘रिजन्सी अनंतम्’ मधील रहिवाशांनी रविवारी तेथील बिल्डरच्या कार्यालयातच ठिय्या मांडला. पाण्याचा प्रश्न सोडविला नाही तर आंदोलन आणखी चिघळणार असल्याचे आंदोलनाला बसलेल्या रहिवाशांनी प्रसिद्धी माध्यमांना सांगितले.

‘रिजेन्सी अनंतम्’ मधील मागील आठ-दहा दिवसांपासून पाणी पुरवठा बंद असल्याने पाण्यासाठी तेथील रहिवासी त्रस्त आणि हैराण झाले आहेत. बिल्डर आणि प्रशासन लक्ष देत नाही. त्यामुळे आवश्यक तितका पाणी पुरवठा होत नाही. त्यामुळे रविवारी सर्व रहिवाशांनी बिल्डरच्या ऑफीसमध्ये मोर्चा नेला. या रहिवाशांनी पाण्यासाठी टाहो फोडत बिल्डरला धारेवर धरले. रहिवाशांची बिल्डरने भेट घेऊन पाणी पुरवठा सुरळीत करण्याचे आश्वासन दिले. त्यानंतर रहिवाशांनी आंदोलन तूर्तास स्थगित केले. मात्र अशी परिस्थिती यापुढे निर्माण झाल्यास त्यानंतर होणाऱ्या परिणामांना बिल्डरसह महापालिका प्रशासन जबाबदार असल्याचा इशारा या रहिवाशांनी दिला.

संपादक: मोईन सय्यद / प्रतिनिधी: अवधुत सावंत

ठाकुर्ली येथील भोईरवाडीतील खंबाळपाडा तलावातील गेल्या आठ दिवसात मृत मास्यांमुळे दुर्गंधी पसरली आहे. त्यामुळे तेथील नागरिक हैराण झाले आहेत. येथील नागरिकांना दुर्गंधी येऊ नये म्हणून खिडकी दरवाजे बंद करून सध्या राहावे लागत आहे. याबाबत कल्याण-डोंबिवली महापालिकेकडे आठ दिवसापासून स्थानिक नागरिक तक्रार करत असून महापालिका दुर्लक्ष करीत असल्याचे नागरिकांचे म्हणणे आहे. तर या परिसरात साथीचे रोग पसरण्याची भिंती स्थानिकांकडून व्यक्त केली जात आहे.

खंबाळपाडा येथील तलावात गणपती आणि इतर देवतांचे विसर्जन नित्यनेमाने होत असते. आता उन्हाळ्यामुळे तलावातील पाणी आटले आहे. सदर तलावातील पाणी हिरवे झाले असून ते दूषित झाले असावे असा स्थानिक नागरिकांचा कयास आहे. असे असताना, अचानक आठ दिवसापासून येथे मासे मेल्यानंतर जी भयंकर दुर्गंधी येते तशी तलावाच्या आसपासची दुर्गंधी परिसरात पसरली असून त्याचा स्थानिक नागरिकांनी याबाबत शोध घेतला असता, या तलावातील मासे मृत अवस्थेत आढळल्याचे दिसून आले. स्थानिक नागरिकांनी प्रसिद्धी माध्यमांना दिलेल्या माहितीनुसार या तलावातील मासे मरावे यासाठी रसायन टाकल्याचा संशय व्यक्त केला जात आहे. हे मृत मासे खाण्यासाठी परिसरातील भटके कुत्रे तलावाच्या आसपास फिरत असल्याचे नागरिकांचे म्हणणे आहे.

या तलावातील पाणी उपसून साफसफाई करावी याकरिता कॉम्रेड काळू कोमास्कर आणि स्थानिक नागरिकांनी वारंवार महापालिका सहाय्यक आयुक्त आणि आरोग्य निरीक्षक यांच्याशी संपर्क साधला होता. मात्र यावर कारवाई करण्याबाबत महापालिकेकडून चालढकल करण्यात येत असल्याची तक्रार स्थानिक नागरिकांनी केली आहे. याबाबत “फ” प्रभागाचे सहाय्यक आयुक्त भरत पाटील यांना विचारले असता, सदर खंबाळपाडा तलावातील मासे मृत झाल्याची तक्रार आल्याचे त्यांनी सांगितले. तेथे दोन दिवसांपूर्वी महापालिकेच्या कर्मचाऱ्यांनी औषध फवारणी केली असल्याचेही सांगितले.

संपादक: मोईन सय्यद / प्रतिनिधी: अवधुत सावंत

महाराष्ट्र राज्यातील सत्ता संघर्षात मुख्यमंत्री नामदार एकनाथ शिंदे यांच्या नेतृत्वाखाली महाराष्ट्राचे विद्यमान सरकार व शिवसेने संदर्भात सर्वोच्च न्यायालयाने दिलेल्या सकारात्मक निर्णयानुसार कल्याण-डोंबिवली महानगरपालिकेचे माजी नगरसेवक तथा पिंपळेश्वर मंदिर ट्रस्टचे सचिव पंढरीनाथ पाटील यांनी केलेल्या संकल्पानुसार आज शुक्रवारी प्राचीन तीर्थक्षेत्र श्री पिंपळेश्वर महादेव मंदिर येथे संकल्पपूर्ती अभिषेक तसेच एका भव्य महाआरतीचे आयोजन करण्यात आले होते.+

यावेळी डोंबिवली शिवसेना शहरप्रमुख राजेश मोरे, शिवसेना जिल्हा संघटक, माजी नगरसेवक तथा कल्याण ग्रामीण तालुकाप्रमुख महेश पाटील, कल्याण ग्रामीण सचिव बंडू पाटील, श्री पिंपळेश्वर महादेव मंदिर ट्रस्टचे नवनिर्वाचित अध्यक्ष मोहन पाटील, उपसचिव अरुण पाटील, उपाध्यक्ष रतन म्हात्रे, सदस्य सुरेश पाटील, कल्याण तालुका संघटक अर्जुन पाटील, शिवसेना डोंबिवली उपशहर प्रमुख सुनील भोसले, उपशहर संघटक संतोष तळाशीकर, विभाग प्रमुख अमोल पाटील, उप-कार्यालय प्रमुख धर्मराज शिंदे, माजी नगरसेविका डॉ. सुनिता पाटील, प्रकाश माने, युवा सेनेचे जिल्हा पदाधिकारी योगेश म्हात्रे, रवी मट्या पाटील, रवी अंबो म्हात्रे, दिपाली स्वप्निल पाटील, उमेश पाटील, विभाग प्रमुख अनिल म्हात्रे, सचिन म्हात्रे, ऍड. स्वप्निल पंढरी पाटील, डोंबिवली शहर व कल्याण ग्रामीण क्षेत्रातील अनेक मान्यवर कार्यकर्ते आणि नागरिक बंधू भगिनी श्रद्धापूर्वक मोठ्या संख्येने उपस्थित होते.

श्री पिंपळेश्वर महादेव मंदिर हे जागृत देवस्थान आहे. याचा सहा वेळा मला अनुभव आला होता. यंदा देखील मी केलेल्या संकल्पनुसार माझी इच्छा पूर्ण केली. म्हणून मी अभिषेकाचे आणि शिवसेनेच्या वतीने महाआरतीचे आयोजन केले होते असे पंढरीनाथ पाटील यांनी प्रसिद्धी माध्यमांना सांगितले.