मिलन शाह, पुणे : पुणे येथील भीमा नदीच्या पात्रातील २८ मोऱ्यांच्या रेल्वे पूलाजवळ शंकराचे मुख असलेली जवळपास १५० वर्षांपूर्वीची दगडी मूर्ती खोदकामात सापडली आहे. मूर्तीचे तोंडाची उंची जवळपास पाच फुट असून वजन एक टनाच्या आसपास आहे.
दौंड-नगर रेल्वे लोहमार्गासाठी गेल्या १५० वर्षांपूर्वी इंग्रजांनी दगडी काम केलेला पूल उभारला आहे. या पूलाच्या बाजूलाच दुसऱ्या रेल्वे पूलाच्या पायाभरणीचे काम सध्या सुरु आहे. या ठिकाणी शनिवारी खोदकाम सुरू असतांना एका खड्यात ही अवाढव्य मूर्ती सापडली असून कामागारांनी ही मूर्ती जेसीबीच्या सहाय्याने बाजूला काढून ठेवली आहे.
स्थानिक नागरिकांच्यामते ही मूर्ती पाण्याच्या प्रवाहात वाहून आली असावी. मात्र, मूर्तीचा प्रचंड आकार आणि वजन जास्त असल्याने ही मूर्ती पाण्यातून वाहून येऊ शकत नाही. ती याच ठिकाणची असल्याची शक्यता काही तज्ञांनी व्यक्त केली. मूर्तीच्या मुखाचा भाग सापडला असून याच परिसरात मूर्तीचे इतर अवशेषही सापडण्याची शक्यता वर्तवली जात आहे.
