लोकहित न्युज

ह.भ.प. इंदुरीकर महाराज यांच्या हस्ते अनेक मान्यवरांच्या उपस्थितीत भूमिपूजन सोहळा संपन्न!

मिरा-भाईंदर, प्रतिनिधी: संपूर्ण महाराष्ट्रात एकमेव असणारे वारकरी संप्रदायाचे भवन मिरा-भाईंदर शहरात तयार होणार असून या संत ज्ञानेश्वर माऊली वारकरी भावनांचा भूमिपूजन सोहळा 03 नोव्हेंबर रोजी ह.भ.प. इंदुरीकर महाराज यांच्या हस्ते गानसम्राज्ञी स्व. लता मंगेशकर नाट्यगृह सभागृहात आयोजित एका भव्य कार्यक्रमात संपन्न झाला.

सुमारे दोन कोटी रुपये खर्च करून मिरा-भाईंदर महानगरपालिका कार्यक्षेत्रातील मन ओपस सुविधा क्षेत्र भूखंडावर महाराष्ट्रातील पाहिले संत ज्ञानेश्वर माऊली वारकरी भवनाचे निर्माण करण्यात येणार असून पुढील वर्षभरात या भवनाचे निर्माण कार्य पूर्ण करण्यात येणार असल्याची माहिती महापालिका प्रशासनाने दिली आहे.

या भूमिपूजन कार्यक्रमास शिवसेनेचे आमदार प्रताप सरनाईक, भाजपच्या आमदार गीता जैन, आयुक्त तथा प्रशासक दिलीप ढोले, अतिरिक्त आयुक्त डॉ. संभाजी पानपट्टे, अनिकेत मनोरकर त्याच बरोबर महानगरपालिकेचे सर्व अधिकारी, कर्मचारी आणि मिरा-भाईंदर शहरातील वारकरी संप्रदायाचे अनेक मान्यवर, नागरिक मोठया संख्येने उपस्थित होते.

संत ज्ञानेश्वर माऊली वारकरी भवनाच्या भूमिपूजन कार्यक्रमानंतर सर्व मान्यवरांनी भारतरत्न गानसम्राज्ञी लता मंगेशकर नाट्यगृह याठिकाणी उपस्थिती दर्शवली. या ठिकाणी अंदाजे 2000 ते 2200 इतक्या वारकरी सांप्रदाय नागरिकांच्या उपस्थितीत ह.भ.प. इंदुरीकर महाराज यांचा हरीभक्ती कीर्तनाचा कार्यक्रम मोठया उत्साहाने संपन्न झाला.

कीर्तनात इंदुरीकर महाराज यांनी महाराष्ट्रात प्रथमच स्थापन होत असलेले वारकरी भवनचे कार्य कौतुकास्पद असल्याचे सांगत मिरा भाईंदर शहरातील वारकरी सांप्रदायाला या वास्तूचा भविष्यात मोठ्या प्रमाणात उपयोग होणार असल्याचे महाराजांनी नमूद केले.

ह.भ.प. इंदुरीकर महाराज यांनी वेळात वेळ काढून मिरा भाईंदर शहराच्या धर्तीवर महाराष्ट्र राज्यातील सर्वप्रथम वारकरी भवन भूमिपूजन कार्यक्रमास आवर्जून उपस्थिती दर्शवली यासाठी आयुक्त दिलीप ढोले यांनी त्यांचे आभार व्यक्त केले. त्याच प्रमाणे या कार्यक्रमाला सर्व मान्यवर, पोलीस प्रशासन, स्थानिक लोकप्रतिनिधी, माजी नगरसेवक, उपस्थित नागरिक, उपस्थित सर्व पत्रकार, प्रिंट मीडिया, इलेक्ट्रॉनिक मीडिया यांनी वेळात वेळ काढून संत ज्ञानेश्वर माऊली वारकरी भवन भूमिपूजन सोहळ्यास उपस्थित राहिल्याबद्दल मिरा-भाईंदर महानगरपालिका आयुक्त तथा प्रशासक दिलीप ढोले यांनी सर्वांचे आभार व्यक्त केले.

“राष्ट्रीय एकता” दिनानिमित्त आयुक्त यांच्या अध्यक्षतेखाली करण्यात आले “मानवी एकता साखळीचे” आयोजन

31 ऑक्टोबर ते 6 नोव्हेंबर या कालावधीत भ्रष्टाचाराविरुद्ध दक्षता जनजागृती सप्ताह करण्यात येणार साजरा – आयुक्त दिलीप ढोले

मिरा भाईंदर, प्रतिनिधी: संपूर्ण देशात 31 ऑक्टोबर रोजी थोर स्वातंत्र्य सैनिक व भारताचे पहिले गृहमंत्री स्वर्गीय सरदार वल्लभभाई पटेल यांची जयंती साजरी केली जाते. या निमित्ताने मिरा-भाईंदर महानगरपालिका मुख्य कार्यालय प्रांगणात “राष्ट्रीय एकता दिनाचे” औचित्य साधून महानगरपालिका आयुक्त तथा प्रशासक दिलीप ढोले यांच्या अध्यक्षतेखाली “मानवी एकता साखळी” चे आयोजन करण्यात आले होते.

या कार्यक्रमात अतिरिक्त आयुक्त संभाजी पानपट्टे, अतिरिक्त आयुक्त अनिकेत मनोरकर, उपायुक्त (मुख्यालय) मारुती गायकवाड, उपायुक्त (उद्यान) संजय शिंदे, उपायुक्त (सार्व. आरोग्य) रवी पवार, शहर अभियंता दिपक खांबित, अतिरिक्त शहर अभियंता सुरेश वाकोडे, तहसीलदार नंदकिशोर देशमुख, महानगरपालिका विभागप्रमुख/खातेप्रमुख व कर्मचारी आवर्जून उपस्थित होते.

सदर प्रसंगी “राष्ट्रीय एकता दिनाचे” औचित्य साधून राष्ट्रीय एकात्मकतेची शपथ घेण्यात आली. महाराष्ट्र शासनाच्या सामान्य प्रशासन विभागामार्फत 31 ऑक्टोबर ते 6 नोव्हेंबर या कालावधीत भ्रष्टाचाराविरुद्ध दक्षता जनजागृती सप्ताह साजरा करण्यात येणार असून त्याची अंमलबजावणी मिरा-भाईंदर महानगरपालिका कार्यक्षेत्रात देखील करण्यात येणार असल्याचे आयुक्त यांनी सांगितले.

भ्रष्टाचाराविरुद्ध लढा देण्यासाठी सर्व विभागप्रमुख/खातेप्रमुख व कर्मचारी यांच्या उपस्थितीत प्रतिज्ञा घेण्यात आली. सदर शपथ/प्रतिज्ञा समाप्तीनंतर मिरा-भाईंदर महानगरपालिका मुख्य कार्यालय पासून अंदाजे एक ते दीड किलोमीटर इतकी लांब “मानवी एकता साखळी” तयार करून शहरातील नागरिकांमध्ये राष्ट्रीय एकात्मकते बाबत जनजागृती करण्यात आली. या मानवी एकता साखळीमध्ये आयुक्त, अतिरिक्त आयुक्त, उपायुक्त, महानगरपालिका सर्व विभागप्रमुख/खातेप्रमुख, कर्मचारी व सफाई कर्मचारी यांनी उत्स्फूर्तपणे सहभाग नोंदवला.

31 ऑक्टोबर ते 06 नोव्हेंबर या कालावधीत भ्रष्टाचार विरुद्ध दक्षता व जनजागृती मोहीम चालविण्यात येणार असून या काळात भ्रष्टाचार मुक्त प्रशासन चालविण्याचे आवाहन आयुक्त दिलीप ढोले यांनी जरी केले असले तरी मात्र महापालिका प्रशासनातील अधिकारी आणि कर्मचारी यावर खरे उतरतात का? असा सवाल उपस्थित केला जात आहे.