लोकहित न्युज

संपादक: मोईन सय्यद / प्रतिनिधी: अवधुत सावंत

राज्याचे मुख्यमंत्री एकनाथ शिंदे यांनी बंड केल्यानंतर शिवसेना पक्ष दोन गटात विभागला आहे. त्यातच हा वाद न्यायालयातून निवडणूक आयोगाकडे गेला. त्यानंतर निवडणूक आयोगाने शिवसेना हे नाव आणि धनुष्यबाण हे चिन्हं गोठवलं. त्यामुळे दोन्ही गटांना आता स्वतंत्र नाव आणि चिन्हं मिळाले असून त्यात आता शिंदे गटाला ‘ढाल-तलवार’ हे चिन्हं मिळाले आहे. त्यासोबत शिंदे गटाला बाळासाहेबांची शिवसेना असं नाव देण्यात आलं होतं. मात्र शिंदे गटाला चिन्हांचे पर्याय पुन्हा देण्याच्या सूचना निवडणूक आयोगाकडून करण्यात आल्या होत्या. त्यानंतर शिंदे गटाने तीन पर्याय दिले होते त्यात ‘ढाल-तलवार’ हे निवडणूक चिन्हं अधिकृतरित्या केंद्रीय निवडणूक आयोगाकडून शिंदे गटाला प्राप्त झाले आहे.

मुख्यमंत्री एकनाथ शिंदे यांच्या गटाला केंद्रीय निवडणूक आयोगाने ‘ढाल-तलवार’ हि निशाणी दिली आहे. मंगळवारी सायंकाळी डोंबिवलीतील श्री गणेश मंदिर संस्थान येथे ‘ढाल-तलवार’ निशाणी ची विधीवत पूजा करण्यात आली.

यावेळी कल्याण उपजिल्हाप्रमुख राजेश कदम, डोंबिवली शहरप्रमुख राजेश मोरे, जनार्दन म्हात्रे, संजय पावशे, पंढरीनाथ पाटील, धर्म राज शिंदे, बंडु पाटील, नितीन पाटील, संतोष चव्हाण, सागर जेधे, उपशहरप्रमुख अमित बनसोडे संजय विचारे, अमोल पाटील, गजानन व्यापारी, इतर पदाधिकारी आणि असंख्य कार्यकर्ते उपस्थित होते.

संपादक: मोईन सय्यद / प्रतिनिधी: अवधुत सावंत

केंद्रीय निवडणूक आयोगाने शिवसेनेचा चिन्ह गोठवल्यानंतर राज्यात शिवसैनिकांच्या संतप्त प्रतिक्रिया उमटत आहेत. तसेच शिवसेनेचे चिन्ह गोठवल्यानंतर राऊतांचा हा व्हिडीओ पुन्हा सोशल मीडियावर तुफान व्हायरल होत आहे. राजकीय पक्ष आरोप प्रत्यारोपामध्ये गुंतले आहेत. दुसरीकडे शिवसेनेची तोफ संजय राऊत यांना अटक झाल्यानंतर त्यांनी महाराष्ट्र कमजोर होतोय, पेढे वाटा पेढे असे भाकित केले होते. राऊतांच्या या भविष्यवाणीची सध्या सोशल मिडीयातही मोठी चर्चा रंगली आहे.

संजय राऊत सध्या न्यायालयीन कोठडीत असून एकनाथ शिंदे यांच्यासह ४० आमदारांच्या मदतीने सुरत व्हाया गोवाहाटी मध्ये जाऊन बंड केला. शिवसेनेत या बंडखोरीने दोन गट पडले. फुटीर शिंदे गटाने पक्ष आणि चिन्हावर दावा केला. संजय राऊतांनी यानंतर शिंदे गटाच्या बंडखोर आमदारांवर घणाघात चढवला होता. संजय राऊतांच्या आक्रमकतेने राज्यातील शिवसैनिक चवताळून उठला होता. अखेर कथित पत्राचाळ घोटाळ्या प्रकरणी ‘ईडी’ने संजय राऊत यांना अटक केली. सध्या ते न्यायालयीन कोठडीत आहेत. ‘ईडी’ने संजय राऊत यांना अटक करताच शिंदे गटाच्या नेत्यांनी आनंदोत्सव साजरा केला. संजय राऊत यांनी ‘ईडी’च्या कार्यालयाबाहेर प्रसारमाध्यमांशी संवाद साधताना, महाराष्ट्र कमजोर होतोय, पेढे वाटा पेढे, असे विधान केले होते.

संजय राऊत यांचा प्रादेशिक पक्षाला संपवल्याचा शिंदे गटावर ठपका

हिंदूहृदयसम्राट बाळासाहेब ठाकरे यांनी १९६६ ला शिवसेनेची स्थापना केली. शिवसेनेला ओळख म्हणून वाघ चिन्ह तर धनुष्यबाण हे निवडणूक चिन्ह मिळाले होते. आम्हीच खरी शिवसेना असल्याचा दावा करणाऱ्या एकनाथ शिंदे यांच्या बंडानंतर शिवसेनेचे चिन्ह गोठवले गेले. राज्यात यामुळे शिवसैनिकांकडून संताप व्यक्त केला जातो आहे. एका प्रादेशिक पक्षाला संपवल्याचा शिंदे गटावर ठपका सोशल मीडियातून ठेवण्यात आला आहे. तसेच जोरदार टीकास्त्र सुरु आहेत. अशातच संजय राऊत यांच्या महाराष्ट्र कमजोर होतोय, हे भाकित करणारे विधान जोरदार व्हायरल झालं आहे. अनेकांनी संजय राऊतांनी वर्तवलेल्या भाकितांवरून भाजप आणि शिंदे गटावर निशाणा साधताना दिसत आहेत. ज्येष्ठ नेत्यांना डावलणारा भाजप पक्ष आगामी काळात शिंदेंना किती सहकार्य करेल, असा प्रश्न ही सोशल मीडियातून विचारला जातो आहे.

संपादक: मोईन सय्यद / प्रतिनिधी: अवधुत सावंत

मुंबई क्रिकेट संघटनेच्या (एमसीए) होऊ घातलेल्या निवडणुकीला मोठी कलाटणी मिळाली आहे. आज निवडणुकीसाठी उमेदवारी अर्ज भरण्याचा शेवटचा दिवस असताना या निवडणुकीत प्रतिस्पर्धी म्हणून एकमेकांसमोर उभे ठाकण्याची शक्यता असलेले शरद पवार गट आणि आशिष शेलार गट यांनी युती करत एकत्र निवडणूक लढवण्याचा निर्णय घेतला आहे. आज शरद पवार आणि आशिष शेलार यांच्यात चर्चा झाल्यानंतर एकत्र निवडणूक लढवण्याचा निर्णय घेण्यात आल्याचे वृत्त आहे.

शरद पवार आणि आशिष शेलार यांचे गट एकत्र आल्याने आता निवडणुकीमध्ये शरद पवार आणि आशिष शेलार असा संयुक्त गट असेल. तसेच ऐनवेळी हे दोन्ही गट एकत्र आल्याने आता शरद पवार गटातील अध्यक्षपदाचे उमेदवार संदीप पाटील यांच्यासह इतर उमेदवारांचं भवितव्य काय असेल, याबाबत प्रश्न निर्माण झाला आहे. दरम्यान, निवडणूक लढवत असलेल्या शरद पवार यांच्या गटामध्ये मिलिंद नार्वेकर आणि जितेंद्र आव्हाड यांचाही समावेश आहे. तर देवेंद्र फडणवीस यांचे निकटवर्तीय अमोल काळे हेही मुंबई क्रिकेट संघटनेची निवडणूक लढवत आहेत.

दरम्यान, या निवडणुकीसाठी शरद पवार यांनी आपला वेगळा गट जाहीर केला होता. तसेच उमेदवारांनी उमेदवारी अर्जही भरले होते. मात्र आज संपूर्ण निवडणुकीलाच अचानक कलाटणी मिळाली. शरद पवार आणि आशिष शेलार यांच्यातील चर्चेनंतर दोन्ही गटांनी एकत्र निवडणूक लढवण्याचा निर्णय घेतला. तसेच या संयुक्त गटाचं निवेदनही जाहीर झालं आहे, त्यामुळे आता उर्वरित उमेदवारांचं काय होणार, तसेच निवडणुकीचा काय निकाल लागणार याची उत्सुकता लागली आहे.